Кўнгил айниганда нима қилиш керак? 7 оддий маслаҳат

Кўнгил айниши ҳазм қила олмаслик, вируслар, ёқимсиз ҳидлар ёки стресс натижасида пайдо бўлиши мумкин. Эътиборингизга бу ёқимсиз ҳолатни енгиллаштиришга ёрдам берувчи бир неча усулларни ҳавола қиламиз.

Ётманг

Ётсангиз меъда суюқлиги қизилўнгачгача кўтарилади ва кўнгил айниш, ноқулайлик ҳолатларини кучайтиради. Агар сиз кислотали рефлюксдан азият чексангиз, овқатланишдан кейин дарров ётиш тавсия қилинмайди.

Шунингдек меъда босилмаслиги учун қорин мушакларини қисмасликка ҳаракат қилинг. Агар кўнглингиз айниётган бўлса, ўтиринг ва иложи борича камроқ ҳаракат қилинг.

Деразани очинг ёки вентилятор ёнида ўтиринг

Шунда сиз ёқимсиз ҳидлардан қутуласиз ва чалғийсиз. Тоза ҳаво кўнгил айнишни енгиллаштиради.

Совуқ компресс қилинг

Кўнгил айнишда ҳарорат кўтарилиши мумкин. Бир неча дақиқа бўйин орқасига совуқ компресс қўйинг. Бу ҳароратни туширишга ва кўнгил айнишини камайтиришга ёрдам беради.

Ўзингизни чалғитинг

Кўнгил айниши ҳақида қанча кўпроқ ўйласангиз, ўзингизни шунча ёмонроқ ҳис қиласиз. Диққатингизни китобга ёки фильмга чалғитинг. Агар сиз ишда бўлсангиз, бир неча марта чуқур нафас олинг, кейин эса ишларингиз билан шуғулланинг.

Кўпроқ суюқликлар ичинг

Кўнгил айниши сувсизланишнинг аломати бўлиши ҳам мумкин, лекин бирдан кўп суюқлик ичиш ёқимсиз ҳолатни фақат кучайтиради. Суюқликни бутун кун давомида кичкина қултумлар билан ичинг.

Мойчечакдан тайёрланган чой ичинг

Мойчечак — кўнгил айнишига қарши машҳур халқона восита. Бундан ташқари у тинчлантиради ва ухлашга ёрдам беради. Бир пиёла қайноқ сувга бир ош қошиқ мойчечак гулидан солинг, беш дақиқа дамлаб қўйинг ва ичинг.

Лимон ҳидланг

Лимон таркибида ҳазм қилиш учун фойдали бўлган лимон кислотаси мавжуд. Агар кўнгил айниш ич қотиш натижасида пайдо бўлган бўлса, лимон шарбати қўшилган илиқ сув ичакларни юмшатишга ёрдам беради. Фақат меъёридан ошириб юборманг — лимон кислотасининг ортиқча миқдори кўнгил айнишини кучайтириши мумкин.

Ҳатто лимон ҳиди ҳам кўнгил айнишини кетказишга ёрдам беради. Эфир мойи ёки кесилган янги лимонни ҳидланг.

Агар кўнгил айниш хуружлари бир ой давомида ўтиб кетмаса, албатта шифокорга мурожаат қилинг.

Манба: «Zdorovie.com»