Давлат айбловчиси Жасурбек Иброҳимовнинг ўлими юзасидан ўтказилган суд мажлисида айбдор Исломбек Тўлагановга нисбатан олти йилга озодликдан маҳрум қилиш жазосини тайинлашни сўради. Бу ҳақда UZ24 хабар берди.
Ислом Тўлаганов жабрланувчининг ўлимига сабаб бўлган қасддан баданга оғир шикаст етказиш (104-моддаси 3-қисми «д» банди) билан айбланмоқда. У ўз айбини тан олмади.
«Инсон ҳаёти ва саломатлиги бебаҳо бойликдир, уни бу бойликдан маҳрум қилиш ва зиён етказиш — ҳақиқий фожиа. Инсон саломатлигига рахна солиш, унга жисмонан, маънан зиён етказиш ҳаётни чеклайди. Баъзи инсонлар инсоннинг яшаш ҳуқуқи ва эркин фаолиятидан маҳрум қиладиган жиноят содир этади. Шундай фуқаролардан бири ҳозир суд залида темир панжара ортида ўтирган Исломбек Тўлагановдир», — деди давлат айбловчиси, Миробод туман прокурори ёрдамчиси Бахтиёр Акромов.
Унинг қайд этишича, гувоҳларнинг кўрсатмалари, суд-тиббиёт ва биологик экспертиза хулосалари, Ўрта махсус таълим маркази, Соғлиқни сақлаш вазирлиги, ички ишлар органлари томонидан ўтказилган текширувлар ҳамда далилий ашёлар судланувчининг айбини тўла исботламоқда.
«Судланувчининг шахси, етказилган зиённинг даражаси ва аҳамияти, оғирлаштирувчи ва енгиллаштирувчи жиҳатларни ҳисобга олиб, Жиноят кодексининг 85-моддаси (озодликдан маҳрум қилиш) билан Тўлагановга олти йилга озодликдан маҳрум қилиш жазоси тайинланишини сўрайман», — деди Акромов.
Боровский номидаги тиббиёт коллежининг талабаси Жасурбек Иброҳимовнинг ўлими юзасидан очилган жиноий иш бўйича дастлабки суд эшитуви 26 сентябрь куни Жиноий ишлар бўйича Миробод туман судида бошланди. Суд мажлиси очиқ тарзда ўтказилди.
27 октябрь куни бўлиб ўтадиган суднинг навбатдаги мажлисида марҳумнинг онаси Нилуфар Алиева сўзга чиқади.
Изоҳ (0)