«Ўзбекистон ҳаво йўллари» миллий авиакомпаниясида минтақавий менежер Жордан Карамалаков бошчилигидаги Ҳаво транспорти халқаро ассоциацияси (IATA) делегацияси билан учрашув бўлиб ўтди. Бу ҳақда МАК матбуот хизмати маълум қилди.
Учрашув давомида Жордан Карамалаков бошқа давлатлар авиакомпаниялари билан тенгма-тенг рақобат қилиш имконини берадиган 1999 йилги Монреал конвенцияси ратификацияси масаласини кўриб чиқишни таклиф этди.
IATA билан Ўзбекистонда авиация транспортида ўзаро ҳисоб-китобларнинг халқаро тизими — Billing and Settlement Plan (BSP) минтақавий ваколатхонасини очиш, консултатив хизматлар тақдим этиш йўли билан мамлакат аэропортларини модернизация қилиш, IATA курсларида ходимлар ўқишини ташкиллаш масалалари муҳокама этилди.
Делегация Ўзбекистонда 2018 йили фуқаролик авиациясининг минтақа миллий иқтисодиётларига таъсирига бағишланган халқаро конференцияни ўтказишни таклиф қилди.
Музокаралар якуни бўйича МАК ва IATA ўртасида ҳамкорликдаги ҳаракатларнинг 2018—2019 йилларга мўлжалланган режасини ишлаб чиқиш ва келишиб олишга қарор қилинди.
Изоҳ (0)