Саид Мухторов 2016 йилгача рухсат берилмаган «Кулба» фильмини премьера қилади
«Дилшоҳ медиа» кино компанияси буюртмаси билан режиссёр Саид Мухторов томонидан суратга олинган «Кулба» фильмининг премьера куни аниқ бўлди. Бу ҳақда фильм режиссёри Саид Мухторов журналист Феруз Муҳаммадга маълум қилди.
Профессионал актёр ва актрисалар жам бўлган мазкур картинанинг премьераси 27 октябрь куни Алишер Навоий номли кино саройида бўлиб ўтади.
Шу вақтгача «Кулба» фильмининг ғояси ҳақида ўйлаб юрардим, аммо 2016 йилгача қариялар уйида фильм суратга олиш учун рухсатнома ололмаганмиз. Бугунга қадар қариялар уйида суратга олинган фильм йўқ эди. «Ғариблар» деб номланган спектаклни биламиз, аммо бутунлай қариялар уйида суратга олинган бирорта ўзбек фильмини билмаймиз. «Кулба» фильми мухлисларнинг қалбидан чуқур жой эгаллаган «Фарёд» фильми даражасидаги фильмдир.Саид Мухторов, режиссёр ва актёр
Фильмни суратга олиш жараёнларидан премьерага қадар бир йилдан ортиқроқ вақт сарфланган.
Фильмда Ўзбекистон халқ артистлари Убайдулла Омон, Гавҳар Зокирова, Яйра Абдуллаева, Рихси Ибрагимова, Ўзбекистон санъат арбоби Исамат Эргашев, Ўзбекистонда хизмат кўрсатган артистлар Саида Раметова, Мадина Муҳторова, Фатҳулла Масъудов ҳамда бошқалар роль ижро қилган.
Сценарий муаллифи Аҳрор Нурмуҳаммад, оператор Талъат Мансуров, продюсер Маҳмуд Эркабаевлардир.
