Жорий ўқув йили бошланганида «Тошкент» телеканали мухбири Тошкент юридик коллежи атрофида истиқомат қилувчи фуқароларнинг илтимосига кўра, таълим муассасасида содир бўлаётган тартибсизликлар борасида видеолавҳа тайёрлаганди. Репортаж эфирга узатилган эди, бироқ бунга нисбатан ҳеч қандай чора кўрилмаган. Оқибатда 6 октябрь куни ушбу коллежда ўқийдиган талаба ўзининг икки нафар курсдошига пичоқ орқали тан жароҳати етказган, улардан бири вафот этган, деб хабар берди «Новости Узбекистана».
Телеканал мухбирининг айтишича, коллеж атрофидаги уйларда истиқомат қилувчи фуқаролар бир неча бор талабалар ўртасидаги жанжалларга, шунингдек, темир панжаралардан ошиб ўтган ҳолда дарсдан қочаётган ўқувчиларга гувоҳ бўлишган. Аҳоли бу борасида бир неча бор ўқув муассасаси маъмуриятига чора кўришни илтимос қилиб мурожаат этган, бироқ директор Наталья Темирова (7 октябрь куни Адлия вазирлигининг буйруғига асосан вазифасидан озод этилган) бу ўзининг зиммасидаги вазифа эмаслигини айтган.
«Биз бир неча бор коллеж раҳбариятига мурожаат қилиб, муассасада тартиб ўрнатишини сўраганмиз. Бир сафар мен директорнинг олдига дарсга кирмаган ва панжаралардан ошиб ўтаётган ўқувчиларнинг суратларини олиб келдим. Бироқ директор бу унинг муаммоси эмаслигини айтиб, мени ҳайдаб юборди. Агарда кетмасам «фавқулодда тугма»ни босиб милицияга топшириб юборишини айтди», — дейди коллеж қаршисида жойлашган уйда истиқомат қилувчи фуқаролардан бири. Шундан сўнг аёл телевидениега мурожаат қилди.
Аҳолининг телеканал мухбирига маълум қилишича, ўқувчилардан бири панжарадан ошиб ўтаётиб йиқилиб тушган ва унинг устига темир панжара қулаган. Ушбу нохуш ҳодиса ҳақида директорга маълум қилинганда, у ўқувчиларга фақатгина дарс пайтида жавобгар эканлигини маълум қилган.
Кўрсатувни тайёрлаган мухбирнинг сўзлашича, коллеж ўқувчиларининг аксарияти формасиз юради, бир қанча фанлар бўйича ўқитувчилар етишмайди, ўқувчилар эса дарслик етишмаслигидан шикоят қилади. Журналистлар бу каби масалалар юзасидан Наталья Темирова мурожаат қилишганида, у бу каби масалалар билан шуғулланувчи ўринбосарлари бор эканлигини айтиб, масъулиятни ўз бўйнидан соқит қилган.
Эслатиб ўтамиз, жорий йилнинг 6 октябрь куни Тошкент юридик коллежида ўқийдиган 3-курс талабалари ўртасида келишмовчилик содир бўлган, оқибатда Саидкамрон Саидвоҳидов ўзининг икки нафар курсдошига пичоқ орқали тан жароҳати етказган. Улардан бири — Асадбек Парпибоев қон кетиши оқибатида шифохонада вафот этган. Жабрланувчиларнинг иккинчиси — Раҳматилла Ёрқориевга эса зарур тиббий ёрдам кўрсатилиб, уйига жавоб бериб юборилган. Ҳолат юзасидан Жиноят кодексининг 104-моддаси 3-қисми «д» банди («жабрланувчининг ўлишига сабаб бўлган қасддан баданга оғир шикаст етказиш») аломатлари билан жиноят иши қўзғатилган, тергов олиб борилмоқда.
Изоҳ (0)