Тошкентнинг «Пахтакор» клубида тўп сураётган икки легионер ЖЧ—2018 саралаш ўйинлари арафасида ўз терма жамоасидан чақирув қоғози олди. Бу ҳақда клуб матбуот хизмати хабар берди.
Черногория термасининг асосий ҳимоячиларидан бири бўлган Марко Симич яқиндагина ЖЧ—2018 саралашида Қозоғистон дарвозасига гол урганди. У энди Дания ҳамда Польша термаларига қарши ўйинда иштирок этади.
Черногория мундиал йўлланмасини қўлга киритиш имкониятини сақлаб турибди. Бу йўлда Марко Симич ва жамоадошлари Кристиан Эриксен, Роберт Левандовски каби юлдузлар тўп сурадиган жамоаларни мағлуб этиши керак бўлади.
«Пахтакор»нинг исроиллик легионери Гиди Канюк эса Лихтенштейнга қарши сафар ва Испания термасига қарши уй учрашувларида иштирок этишга яқин. Бу йўлда у аллақачон Исроилга жўнаб кетган.
Исроил термаси ЖЧ—2018 чиптасидан қуруқ қолиб улгурган. Шунга қарамай, Канюк Испаниядек кучли терма футболчиларига қарши ўйнаб, катта тажриба орттириши мумкин.
Мана шундай легионерлари бор «Пахтакор» Олий Лиганинг 23-турини Наманганда ўтказиб, «Навбаҳор»га имкониятни бой берганди. Бу Шота Арвеладзе Тошкентда иш бошлаганидан буён илк мағлубият бўлиб тарихга кирди.