Каталония мустақиллиги масаласидаги референдум бошланишига тўрт соат қолганидаёқ ҳудуддаги сайлов участкалари олдида навбатлар юзага кела бошлади, дея хабар бермоқда «РБК».
Навбатда турганлар шу йўл билан сайлов участкаларини Мадриднинг кўрсатмаси билан хатлаётган полициячилардан мудофаа қила оламиз, деб ҳисобламоқда; Каталониядаги референдум Испания ҳукумати томонидан ноқонуний деб топилган.
Reuters агентлиги хабарига кўра, ўнлаб мактаблар (сайлов участкалари мактабларда ташкил этилган) бутун бошли оилалар билан эгалланган бўлиб, улар туни билан бу ерда навбатчилик қилиб чиқди. Баъзи мактабларни эса фермерлар қишлоқ хўжалиги техникалари билан қуршаб олган ҳолда ҳимояга олди.
Фаолларнинг Reuters’га маълум қилишича, улар полиция сайлов участкаси атрофида одамлар кўплигини кўрса, участкани куч билан ёпиб қўйиш фикридан қайтади, деб умид қилмоқда.
Кун ёришишидан анча аввал полиция кучлари ҳам шай ҳолатга келтирилган, Барселона марказига юзга яқин юк машинасида тартиб посбонлари келтирилган. Шунга қарамай, баъзи сайлов участкаларига аллақачон сайлов урналари ва бюллетенлари етказилгани айтилмоқда.
Аввалроқ Испания ҳукумати Каталониядаги 2315 та сайлов участкасидан 1300 дан зиёди полиция томонидан ёпилгани ҳақида ҳисобот берган эди. Айни вақтда, La Vanguardia нашри референдум ташкилотчилари 163 та мактабни эгаллаб олиб, уларнинг ёпилишига қаршилик кўрсатишга қарор қилган.
Каталония ҳукумати режасига кўра, референдум 1 октябрь, якшанба куни маҳаллий вақт билан 9:00 да (Тошкент вақти билан 12:00 да) бошланиши керак. Сайлов участкалари 20:00 гача очиқ бўлади. Бироқ Испания ҳукумати ҳеч қандай овоз бериш бўлмаслиги, референдум «давлат томонидан бекор қилингани»ни таъкидламоқда.
Изоҳ (0)