Facebook’даги «Потребитель.уз» гуруҳи фойдаланувчиси Тошкент вокзалида ҳаммоллар хизмати нархи ҳақида норозилик билдириб пост қолдиргач, вокзал бошлиғи шу муносабат билан алоҳида мажлис ўтказиб, муаммони зудлик билан ҳал қилди. Бу ҳақда «Potrebiteli.uz» сайтида айтилади.
Маълум бўлишича, гуруҳ аъзоси Тошкент Марказий вокзалида «5000 сўм» деб ёзиб қўйилган аравага яқин келганида, ҳаммол, бу эски нарх эканлигини, аслида аравада юк ташиб бериш учун хизмат ҳақи 10 минг сўм эканлигини, ҳар битта ортиқча юк учун нарх ўсиб боришини айтган.
Фойдаланувчи бу ҳақда пост қолдиргач, унга ярим соат ичида Ўзбекистон темир йўллари вакили муносабат билдирган ва сўров вокзал раҳбариятига етказилишини айтган. Унинг айтишича, вокзалда ҳаммоллар хизмати ҳақиқатан ҳам 5 минг сўм. Бундан ташқари, у ерда 50 та аравача йўловчилар бепул фойдаланиши учун ажратилган.
Муаммога тўрт кун ичида нуқта қўйилди. Маълум бўлишича, вокзал бошлиғи воқеадан хабар топгач, йиғилиш ўтказиб, ўша ҳаммолга ҳайфсан берган, бошқалари ҳам нархларни ўзбошимчалик билан белгиламаслик ҳақида огоҳлантирилган.
Изоҳ (0)