Facebook’даги «Потребитель.уз» саҳифаси модератор Лилия Николенко эҳтиёжмандларга ёрдам қўлини чўзган тошкентлик тадбиркорга миннатдорлик билдириб, пост ёзди.
Унинг қайд этишича, бир куни Facebook орқали у билан аллақандай киши боғланиб, болалар кийимлари сотиладиган дўкони борлигини, ҳақиқатда эҳтиёжманд бўлган болаларга дўконидаги кийим-кечаклардан хайрия қилмоқчи эканлигини маълум қилган. Шу билан бирга, дўконнинг номи ҳам, ўзининг исм-шарифи ҳам ошкор этилмаслигини сўраган.
«Дўкон номини эшитиб, бироз ҳайратга тушдим. Тошкентда оммабоп бўлган сифатли ва қиммат кийим-кечаклар сотиладиган бренд дўкон», — деб ёзади Николенко.
Хайрия қилинган буюмлар кўнгиллилар ёрдамида Олмалиқдаги 80-сонли ихтисослашган мактаб-интернат, Сирдарё шаҳридаги мактаб-интернат, ОИВга чалинган болалар учун марказ ҳамда Тошкентдаги бир нечта кам таъминланган оилаларга етказиб берилган.
Хайрия қилган шахс шундан кейин ҳам эҳтиёжмандлар учун яна икки қути кийим-кечак, кир ювиш кукуни ва совун келтирган. Энди эса бошпанасиз икки кишига қишда музлаб қолмаслиги учун улар яшайдиган жойни баннер ёки қурилиш материаллари билан қоплаб чиқишга ёрдам бермоқчи, дейилади постда.
Лилия Николенко номаълум бўлиб қолишни истаган ҳадячига «ушбу сайёрадаги эзгуликни кўпайтиргани» учун чин дилдан, ушбу воқеага дахлдор бўлган барча кишилар номидан миннатдорлик билдирди.
Изоҳ (0)