Вадим Абрамов ўзаро тўқнашувларнинг учинчисида ҳам Миржалол Қосимовга имкониятни бой берди

Кеча — 15 сентябрь куни Ўзбекистон Олий Лигасида 21-тур беллашувлари старт олди. Мазкур турни «Бунёдкор» — «Нефтчи» ўйини очиб берди.

Учрашув Миржалол Қосимов шогирдларининг 2:0 ҳисобидаги ғалабаси билан якунига етди. Беллашувда Акром Комилов ва Воҳид Шодиев муваффақият қозонди.

Томонларнинг Фарғонада ўтган биринчи давра ўйинида «Бунёдкор» 2:1 ҳисобида устун келганди. Ўшанда «қалдирғочлар»га Сергей Лушчан, «Нефтчи»га эса Андрей Фёдоров устозлик қилаётганди. Жавоб ўйинида жамоаларни майдонга Миржалол Қосимов ва Вадим Абрамов бошлаб тушди.

Жорий мавсум ҳисобидан футбол мухлислари Абрамов ва Қосимов тўқнашувига учинчи бор гувоҳ бўлди. Ҳар учала ўйин Қосимовнинг ғалабаси билан якунига етди. Аввалроқ «Бунёдкор» ва «Нефтчи» Ўзбекистон Кубогида тўқнаш келган бўлиб, Фарғонада 2:1, Тошкентда 3:1 ҳисоби қайд этилганди.

21-турдаги ғалабасидан сўнг Тошкент гранди турнир жадвалида кучли учликка кириб олди. «Нефтчи» эса 15-ўринда. Вадим Абрамов ташрифига 9 та тур тўлганига қарамай, мутахассис «Нефтчи» билан ғалаба қозона олмади.

Ўзбекистон Олий Лигаси 21-тур беллашувлари 15 сентябрь, жума

«Бунёдкор» — «Нефтчи» 2:0

16 сентябрь, шанба«Қўқон—1912» — «Машъал» — 16:30«Сўғдиёна» — «Қизилқум» — 18:00«Бухоро» — «Динамо» — 18:00«Навбаҳор» — «Металлург» — 18:00«Насаф» — «Локомотив» — 18:45«Пахтакор» — «Шўртан» — 19:00

17 сентябрь, якшанба«Олмалиқ» — «Обод» — 18:00