Ўзбекистон ва Қозоғистон ўртасида икки томонлама ҳамкорлик бўйича ҳукуматлараро қўшма комиссияга товар айирбошлаш ҳажмини 5 миллиард долларга етказиш вазифаси қўйилди. Бо ҳақда ЎзА хабар берди.
Қозоғистон Ўзбекистоннинг энг муҳим савдо-иқтисодий шерикларидан биридир. 2016 йил якунлари бўйича икки давлат ўртасидаги товар айирбошлаш ҳажми 2 миллиард доллардан ошган. Жорий йилнинг январь—август ойларида савдо айланмаси 35 % ўсган.
Президентлар бу кўрсаткич мамлакатларнинг улкан салоҳиятига мос эмаслиги, бунинг учун қўшма савдо уйларини ривожлантириш, ўзаро савдо номенклатурасини кенгайтириш зарурлигини қайд этди.
Икки мамлакат бозорларида харидоргир маҳсулотларни етказиб бериш, ҳудудлар ўртасидаги ҳамкорликни ривожлантириш, тадбиркорлик субъектлари учун қулай шарт-шароитлар яратишга келишиб олинди.
Транспорт коммуникациялари соҳаси ҳамкорликнинг устувор йўналишлари ҳисобланади. Икки давлатнинг автомобиль ва темир йўллари ўзаро интеграциялашган.
Бу муҳим коммуникация тармоғи учинчи давлатлар учун ҳам транзит вазифасини ўтамоқда. Музокараларда Ўзбекистон ва Қозоғистон ҳудудларидан ташқи савдо юкларини ташишда ўзаро преференциялар ва қўшимча имтиёзлар белгиланиши бу соҳадаги ҳамкорликни тубдан кенгайтиришга хизмат қилиши таъкидланди.
Изоҳ (0)