Ўрган, Бабаян: Берт ван Марвейк Саудияни Жаҳон Чемпионатига олиб чиқди ва истеъфо берди

Футбол бўйича Саудия Арабистони термаси бош мураббийи Берт ван Марвейк истеъфога чиқди. Бу ҳақда ОФК расмий сайти маълумот берди.

Истеъфо сабаблари кўрсатиб ўтилмаган. Голландиялик мутахассис ЖЧ—2018 саралашида саудияликларга устозлик қилиб, шогирдларининг Россия мундиали учун тўғридан-тўғри чиптани қўлга киритишига сабабчи бўлганди.

Саудия Арабистони футбол ассоциацияси ван Марвейкнинг ўрнига аргентиналик Эдгардо Баузани бош мураббий этиб тайинланди. Жамоани 2018 йилнинг ёзида бўлиб ўтадиган мундиалга айнан Бауза тайёрлайди.

Бауза бунга қадар БАА терма жамоасини бошқараётганди. У истеъфога чиққан Маҳдий Алининг ўрнига келиб, айнан Саудияни таслим қилди — 2:1. Таиланд билан 1:1 ҳисобида дуранг ўйнади ва Ироққа имкониятни бой берди — 0:1.

Саудия Арабистони термаси Жаҳон Чемпионатларида учинчи бор аргентиналик мутахассис билан иштирок этади. Бунга қадар АҚШ—1994 га саудияликларни Хорхе Солари олиб борган бўлса, Германия—2006 да уларга Габриэл Кальдерон устозлик қилганди.

Араб мамлакатларида мана шундай қизиқ истеъфолар кузатиб турилади. Бунгача Қатарнинг уругвайлик бош мураббийи Хорхе Фосатти Жанубий Корея термасини мағлуб этиб, истеъфога чиқиб кетганди.