Россияда Федерал хавфсизлик хизмати (ФСБ) томонидан 31 август куни ушланган икки нафар террорчи 1 сентябрь куни қандай ҳужумлар режалаштирилгани аниқланди. Бу ҳақда, «РБК» нашрига асосланиб, Meduza хабар бермоқда.
Операция чоғида гумондорларнинг ёнидан 2 килограмм қўлбола портловчи модда (пероксид ва ацетондан тайёрланадиган «киса» моддаси) ва болта топилган эди.
Муқаддам ушланганларнинг иккиси ҳам Ўрта Осиё вакиллари эканлиги билдирилган эди. Эндиликда уларнинг бири Ўзбекистон, бири Тожикистон фуқароси эканлигини маълум қилинди.
Нашр манбаларига кўра, Ўзбекистон фуқароси Муродбек Қодировнинг ёнидан портловчи моддалар топилган. Тожикистон фуқароси Д. Т. Шарипов эса болта билан қуролланган.
Айтилишича, Қодиров Москва вилоятининг Ленин туманида бу ҳақда расман эълон қилинишидан анча олдин қўлга олинган. Шарипов эса Истра туманида ушланган.
«Улар классик схема бўйича теракт содир этишни режалаштирган: дастлаб бири болта билан одамларга ҳужум қилади, шундан сўнг иккинчиси ўткинчилар тўпланган ерда портлашни амалга оширади», — маълум қилди нашрнинг ФСБдаги манбалари.
Изоҳ (0)