«Ижтимоий фикр» жамоатчилик фикрини ўрганиш маркази мутахассислари мингдан ортиқ респондент ўртасида ўтказган галдаги сўров фуқароларнинг мамлакатда кечаётган ўзгаришларга муносабати ҳамда айни чоғдаги кайфияти билан яқиндан танишиш имконини берди. Тадқиқот натижалари «Дарё»га «Ижтимоий фикр» маркази томонидан тақдим этилди.
Сўров натижалари фуқароларнинг 94 фоизи ушбу байрамни кўтаринки кайфиятда, фахр ва ифтихор туйғуси билан кутиб олаётганини тасдиқлади.
Эътиборлиси, халқ орасида юрт равнақига дахлдорлик, шунингдек, масъулият туйғуси сезиларли равишда ўсди. Буни респондентларнинг 80,4 фоизи қайд этди.
Айтиш жоизки, мутлақ кўпчиликнинг фикрича, масъулият туйғуси ҳар бир ишга виждонан ёндашиш, мамлакат ижтимоий-иқтисодий ҳаётида фаол иштирок этиш, она ватанга ҳамиша хизмат қилишга тайёр бўлиш ҳамда қонунларга бўлган ҳурматида ўзининг амалий ифодасини топади.
Қатнашчиларнинг 86,8 фоизи ўтган йигирма олти йил мобайнида фуқароларда ватанпарварлик даражаси ўсди, деб ҳисоблайди.
Сўровда иштирок этганларнинг мутлақ катта қисми — 97,3 фоизи мамлакатда тинчлик ва хавфсизликни сақлаш, ижтимоий-сиёсий, миллатлараро, динлараро ва ҳарбий ихтилоф ҳамда зиддиятларнинг йўқлиги, осуда ҳаёт мустақилликнинг бош ютуғи ҳисобланишини таъкидлади.
97,9 фоиз респондент ўзини қонун ҳимоясида деб билади. Барча ёшдаги фуқаролар шахсий хавфсизлиги таъминланганидан, кўча-кўйда, жамоат жойларида илғор технологияларни, видеокузатув тизимини жорий қилиш орқали осойишталикни, тартиботни таъминлаш чоралари кўрилаётганидан қониқади.
84,4 фоиз қатнашчилар фикрича, жамиятда қонун устуворлиги тамойилининг мустаҳкамлангани ғоятда муҳим аҳамият касб этади. Инсон ҳуқуқ ва эркинликларини таъминлаш даражаси ҳам эътирофга лойиқ. Халқ билан мулоқотнинг янги тизими шакллангани натижасида турли соҳалардаги долзарб муаммолар ижтимоий адолат ва қонун талабларига мувофиқ ҳал қилинишига одамларда ишонч ҳисси ортган.
Изоҳ (0)