Тошкент шаҳар ИИББ алоҳида вазифалар бажарувчи сафарбар отряди Ўзбекистон Республикаси мустақиллигининг 26 йиллиги, Қурбон ҳайити, «Билимлар куни» байрамларини фуқаролар томонидан юқори кайфиятда кутиб олиниши, уларнинг тинчлик ва осойишталигини ҳамда хавфсизлигини таъминлаш мақсадида юқори даражадаги жанговор тайёргарлик ҳолатига ўтказилди. Бу ҳақда Тошкент шаҳар ИИББ маълум қилди.
Шахсий таркиб замонавий ўқ-отар қуроллар ҳамда техника воситалари билан таъминлган бўлиб, ўз зиммасига юклатилган хизмат вазифаларини бажаришга тайёр.
Шунингдек, Тошкент шаҳар ИИББ Пост-патруль хизмати ва Жамоат тартибини сақлаш бошқармаси ходимлари томонидан пойтахт кўчалари, хиёбонлар ва одамлар гавжум бўлган бозорлар, дам олиш масканлари, таълим муассасалари тинимсиз назоратга олинган.
Қўриқлаш бошқармаси томонидан пойтахтдаги турар ва нотурар жой объектларига 48711 та видеокузатув камераси ва 9492 та қўриқлаш техника воситалари ўрнатилган. Шахсий таркиб томонидан унинг зиммасига юклатилган вазифа ва мажбуриятларнинг тўлақонли бажарилиши учун транспорт ва моддий техника воситалари тўлиқ шай ҳолатга келтирилган.
Йўл ҳаракати хавфсизлиги бошқармаси махсус автомобиль ва мотоциклларни техник кўрикдан ўтказган ва ЙПХ ходимлари мазкур транспорт воситаларида хизмат вазифаларини бажармоқда.
Ёнғин хавфсизлиги бошқармаси байрамларга тайёргарлик кўриш ва уни ўтказиш даврида хавфсизликни таъминлаш мақсадида туман диспетчерлари, бошқарма ахборот коммуникация технологиялари ва алоқа маркази билан тўғридан-тўғри алоқа ўрнатган.
Барча туман видеокузатув мосламалари онлайн тартибда ишламоқда. Ўз навбатида ИИББ навбатчилик қисми билан электрон, радиоалоқа, шаҳар телефон тармоғи орқали боғланилмоқда, вазият бўйича ахборот алмашинуви мукаммаллашувига эришилиб, пойтахт ҳудудида ёнғин хавфсизлигини таъминлаш ва унинг олдини олиш чоралари кўрилган.
Изоҳ (0)