Тошкентдан Киевга парвоз қилувчиларнинг 65 фоизи «Тошкент—Минск» рейсидан, қарийб 30 фоизи «Тошкент—Истанбул» йўналишидан фойдаланади

Тошкент ва Киев шаҳарлари ўртасида авиақатновларни қайта йўлга қўйиш бўйича сўнгги икки йил давомида фаол иш олиб борилмоқда, хусусан, бу масалада Тошкентда иккита учрашув ташкил этилган. Бу ҳақда Ўзбекистоннинг Украинадаги элчиси Алишер Абдуалиев маълум қилди, дея хабар бермоқда «Новости Узбекистана».

Элчининг сўзларига кўра, рейсларни тўлдириш бўйича муаммо бўлмайди. Унинг қайд этишича, «Тошкент—Минск» йўналиши бўйлаб парвоз қилаётган рейсларнинг 65 фоизи кейин Киевга учадиган йўловчилар ҳисобидан тўлдирилмоқда.

Элчи Абдуалиевнинг қайд этишича, бошқа йўналишлар, масалан, «Тошкент—Олмаота» ва «Тошкент—Истанбул» йўналишлари бўйлаб парвоз қилган йўловчиларнинг ҳам тахминан 20—30 фоизи сўнг Киев томон йўл олади.

Икки мамлакат ваколатли органлари мазкур масалани кўриб чиқиш чоғида, энг аввало, одамлар — талабалар, бизнес вакиллари ва бошқаларнинг манфаатларини ҳисобга олишлари лозим. Икки мамлакат пойтахтлари ўртасидаги парвозларнинг яқин вақт ичида қайта йўлга қўйилиши учун биз қўлимиздан келганини қиламиз, деб ўйлайман.

Алишер Абдуалиев, Ўзбекистоннинг Украинадаги элчиси