JV Man Auto Uzbekistan қўшма корхонаси ва SamAvto МЧЖ ишлаб чиқарилаётган автобус ва юк техникасини сотиш механизмларини қайта кўриб чиқди. Бу ҳақда «1news.uz» хабар бермоқда.
25 августдан бошлаб икки корхона томонидан ишлаб чиқариладиган маҳсулотлар нархи эркин алмаштириладиган валютада белгиланади. Тўлов Марказий банкнинг шартнома имзоланган санада ўрнатилган курси бўйича миллий валюта — сўмда амалга оширилади.
Транспорт воситасининг дастлабки тўлови (85 фоиз ва ундан юқори) амалга оширилган тақдирда валюта курсининг ўзгариши тўловнинг қолган қисмига таъсир ўтказмайди, яъни автомобилнинг шартнома нархи ўзгармайди.
Нархларнинг эркин алмаштириладиган валютада белгиланиши маҳсулот қийматини оширмайди, аксинча, қатор позициялар бўйича нархларнинг 10 фоизгача пасайиши кўзда тутилмоқда.
Жумладан, JV Man Auto Uzbekistan маҳсулотларига 18 та позиция бўйича нархлар 9 фоизгача камайтирилди. SamAvto МЧЖ маҳсулотларига 5 позиция бўйича нархлар 10 фоизгача пасайтирилди. Қолган позицияларда икки корхонада ҳам нархлар ўзгаришсиз қолган.
Шунингдек, қайтадан тузилаётган шартномалар бўйича транспорт воситаларини етказиб беришнинг якуний муддатлари ўрнатилди.
Улар автобус ва юк техникаси учун 90 иш кунигача, индивидуал буюртмалар бўйича ишлаб чиқариладиган махсус техника учун 120 кундан 180 кунгача этиб белгиланди.
Изоҳ (0)