Самарқанд шаҳрининг «Қўшчинор» маҳалласидаги Садриддин Айний кўчасида 14 август куни соат тахминан 14:00 да ёнғин юз берди. Самарқанд шаҳар ЙХБ маълумотига кўра, ёнғин газ баллоннинг носозлиги сабабли келиб чиққан. Бу ҳақда STV телеканали хабар бермоқда.
Натижада олов қўшни уйларни ҳам қамраб олган. Воқеа жойига етиб келган ўт ўчирувчилар узоқ вақт алангани жиловлай олмаган. Ёнаётган уй олдида жуда кўп одам тўпланган. Иккита ўт ўчириш машинаси ёнғинни ўчира олмагани сабабли ёрдам кучи чақирилган.
Соат 15:00 да оловни ўчириш учун 10 та ўт ўчириш машинаси ва қарийб 40 нафар ўт ўчирувчи жалб қилинган.
Бу вақтда аланга қўшни уйларга ҳам ўтишга улгурган. Маълумотларга кўра, жабрланганлар йўқ.
Кейинроқ олинган маълумотларга кўра, ёнғин келиб чиққан уйда тез ёнувчан пластмасса ва резина материаллар, автомобиль газ баллонлари бўлган. Қўшниларнинг сўзларига кўра, ёниб кетган уй эгаси автомобиль эҳтиёт қисмлари савдоси билан шуғулланган. Кечки соат 21:00 га борибгина ёнғинни тўлиқ ўчиришга муваффақ бўлинган.
Норасмий маълумотларга кўра, ёнғин қарийб 180 квадрат метр майдонни эгаллаган, саккизта ҳовли ёниб кетган. Ёнғин оқибатида юзага келган моддий зарар ҳозирча ҳисобланмаган.
Изоҳ (0)