Олой бозоридаги банкомат бир кунда салкам 400 кишига хизмат кўрсатмоқда. Тўполонларнинг олдини олиш учун навбатда турганлар рўйхатга ёзилмоқда
Тошкентнинг Олой, Юнусобод ва Қўйлиқ бозорларида 14 августдан бошлаб Ўзбекистон Халқ банки томонидан ўрнатилган, пластик картадаги маблағни нақдлаштириб берувчи банкоматлар ишга тушди.
«Газета.uz»нинг ёзишича, ҳар бир бозорга биттадан банкомат ўрнатилган бўлиб, улар олдида катта навбатлар юзага келмоқда.
Мавзуга доир: Видео: Қўйлиқ бозоридаги нақд пул банкоматига навбат
Олой бозоридаги банкомат олдида навбатлардаги келишмовчиликларнинг олдини олиш мақсадида қоғозда рўйхатлар тузилмоқда.
Хабар беришларича, «Газета.uz» мухбири Олой бозорига 15:00 да ташриф буюрган бўлса, банкомат олдида 30 чоғли киши навбатда турган. Шу кун учун тузилган қоғоздаги навбатда эса 329 кишининг исми-шарифи ёзилганини кўриш мумкин.
«Мен 40 дақиқа аввал навбатга ёзилган эдим. Тушликка бориб келдим, лекин мендан олдинда ҳали яна 15 киши бор», — деди навбатда турганлардан бири.
Қайд этишларича, банкомат 9:00 дан ишлайди. Ҳозирча фуқаролар банкоматдан ўз пулларини Халқ банки ходими назоратида олмоқда.
«Бу ҳолат кўп давом этмайди. Дастлабки вақтларда одамларга банкомат билан ишлашда ёрдам кўрсатиш керак. Кейинчалик бизнинг бу ерда бўлишимизга ҳожат қолмайди», — деди банк ходими.
Банкоматдан бир пластик карта воситасида 100 минг сўмгача бўлган маблағни нақдлаштириб олиш мумкин. Пул маблағлари 1000, 5000 ва 10 000 сўмлик купюраларда тақдим этилади.
