Ҳажга қуритилган нон орасида қорадори олиб кетмоқчи бўлган ўзбекистонлик қўлга тушди (видео)

Ҳаж сафарига йўл олган зиёратчиларни 11 август куни Самарқанд халқаро аэропортидан кузатиш жараёнида самарқандлик Шамши Аҳроровнинг багажларидаги қуритилган нон бўлаклари божхоначилари эътиборини тортган. Бу ҳақда «Ўзбекистон 24» телеканали хабар бермоқда.

Шамши Аҳроровнинг багажлари белгиланган тартибда кўздан кечирилганида, юклар орасидаги қуритилган нон бўлакларининг назорат-рентген аппаратидаги шубҳали тасвирлари божхоначиларнинг диққатини тортган.

Нон бўлаклари холислар иштирокида синчиклаб текширилганида, улар ичига хуфёна тарзда иккита полиэтилен ўрам жойлаштирилгани фош этилган. Багажлардан бирининг тутқичлари орасига ҳам худди шундай ўрамлар яширилгани аниқланган.

Ўрамлар очиб кўрилганида, улар ичида салкам 72 грамм опий — қорадори гиёҳванд моддаси борлиги аниқланган.

Бундан ташқари, Шамши Аҳроровнинг багажларидан бирида йўловчи-божхона декларациясида ва оғзаки сўров вақтида маълум қилинмаган 3800 доллар, қўл сумкасида 422 доллар, чап оёғидаги пайпоғи ичида эса 1500 доллар борлиги аниқланган.

Шунингдек, унинг ёнида Жанубий Корея, Малайзия, Украина, Қозоғистон, Туркия, Саудия Арабистони, Филиппин давлатларининг нақд пул бирликлари бўлган. Қайд этишларича, у жами 24 миллион сўм эквивалентидаги нақд хорижий валютани божхона назоратидан четлаб ўтиб олиб чиқишга уринган.

«Агарда у гиёҳвандлик воситаларини Саудия Арабистонига олиб кириш вақтида фош этилганида эди, ушбу мамлакат қонунчилига кўра, ўлим жазосига ҳукм қилиниши мумкин эди», — дейилади телеканал хабарида. «Ўзбекистон 24» мухбирининг алоҳида қайд этишича, сафар олдидан зиёратчиларга божхонадан ўтишнинг тартиб-қоидалари батафсил тушунтирилган.