Жефф Безос бир кунда дунёнинг энг бой кишиси мақомини бой берди

Amazon асосчиси ва раҳбари Жефф Безос бир суткага ҳам етмаган вақт мобайнида дунёнинг энг бой кишиси мақомини бой берди: у Forbes ва Bloomberg рейтингида яна иккинчи ўринга тушиб қолди. Бу ҳақда TJournal хабар берди.

Бунга компаниянинг жорий йил иккинчи чораги ҳисоботи эълон қилиниши сабаб бўлди. Ҳисоботга кўра, Amazon тушуми ўтган йилнинг шу даврига нисбатан 25 фоизга ўсди ва 38 миллиард долларни ташкил этди.

Шу билан бирга, соф фойда 77 фоизга камайди ва 197 миллион доллардан иборат бўлди. Ўтган йил иккинчи чораги якунида бу кўрсаткич 857 миллион долларга тенг эди.

Мазкур ҳисобот эълон қилиниши фонида Amazon акциялари 1083,31 доллардан 1014 долларга тушди. Безоснинг мол-мулки 89,3—89,8 миллиард долларгача пасайди. У дунёдаги энг бой инсон деб топилган 28 июлда бу кўрсаткич 91 миллиард долларгача кўтарилганди.

Бу борадаги етакчилик яна Microsoft асосчиси Билл Гейтсга қайтди (90,7 миллиард доллар).