«Биз учун муҳим» ток-шоусида «Қўшхотинлик» мавзуси кўтарилди

13 июль куни Ўзбекистон телерадиокомпаниясида «Биз учун муҳим» кўрсатувининг навбатдаги сони бўлиб ўтди. Ушбу кўрсатувнинг аввалгиларидан фарқи бу сафар ток-шоу «Ўзбекистон» канали орқали тўғридан тўғри эфир орқали узатилди.

Кўрсатувда кўтарилган мавзу бугунги куннинг долзарб муаммоси — кўпхотинлик ва унинг фарзандларга, оилага зарари ҳақида бўлди. Ток-шоуда ОАВ вакиллари, Ўзбекистон Халқ ёзувчиси Тоҳир Малик, юрист Лола Саидова, «Оила даврасида» газетаси бош муҳаррири ўринбосари Жасур Кенгбоев ва бошқалар эксперт сифатида иштирок этиб, ушбу мавзу юзасидан ўз фикр-мулоҳазаларини билдириб ўтди.

Кўрсатув андижонлик аёлнинг турмуш ўртоғи ота-онасининг қистови билан бошқа бир аёлга уйланаётганига бағишланган ролик билан бошланди. Шундан сўнг баҳс-мунозаралар асосан шу аёлнинг тақдири атрофида айланди.

«Иккинчи хотин олиш учун фақатгина моддий маблағнинг борлиги, иккисини ҳам кам-у кўст таъминлаб қўйишнинг ўзигина кифоя эмас. Бунда нафақат моддий томондан, балки маънавий томондан ҳам адолатли бўлиш керак. Агарда икки хотин ўртасида ҳар томонлама адолат қилишга кўзингиз етмаса уйланманг, чунки унинг савол-жавоби бор. 2014 йилда мусулмонлар идораси хотини устида хотин олмоқчи бўлган эркакларга никоҳ ўқимаслик ҳақида фатво чиқарган», — деди ток-шоуда эксперт сифатида иштирок этган мусулмонлар идораси вакили.

Кўрсатув иштирокчилари томонидан кўпхотинлик салбий оқибатларга олиб келиши, агарда савоб ёки суннат жиҳатидан иккинчи марта хотин олиш ниятида бўлса нега бошқа бева-бечораларни эмас, ёш қизларга уйланишаётганини, буларнинг барчаси ўткинчи нафсни қондириш учун ўйламасдан қилинаётган нотўғри хатти-ҳаракат эканлиги таъкидланди.

«Менинг олдимга иккинчи хотин бўлиб эрга теккан аёллар келиб туради. Уларнинг аксарияти моддий бойлик учун турмушга чиққан. Эри оламдан ўтиб қолса, биринчи хотини турмуш ўртоғининг маракалари билан оввора бўлган бир пайтда биринчи бўлиб шулар (иккинчи хотин) келиб ‘Меросдан менинг ва болаларимнинг улуши қанча бўлади, менга нима тегади’ деб сўрайди. Кечирасизу, қизлар, аёллар бу ҳақида иккинчи хотин бўлиб тегишдан олдин ўйлаш, суриштириш керак эди», — дейди нотариал идора вакили.