13-iyul kuni O‘zbekiston teleradiokompaniyasida “Biz uchun muhim” ko‘rsatuvining navbatdagi soni bo‘lib o‘tdi. Ushbu ko‘rsatuvning avvalgilaridan farqi bu safar tok-shou “O‘zbekiston” kanali orqali to‘g‘ridan to‘g‘ri efir orqali uzatildi.
Ko‘rsatuvda ko‘tarilgan mavzu bugungi kunning dolzarb muammosi — ko‘pxotinlik va uning farzandlarga, oilaga zarari haqida bo‘ldi. Tok-shouda OAV vakillari, O‘zbekiston Xalq yozuvchisi Tohir Malik, yurist Lola Saidova, “Oila davrasida” gazetasi bosh muharriri o‘rinbosari Jasur Kengboyev va boshqalar ekspert sifatida ishtirok etib, ushbu mavzu yuzasidan o‘z fikr-mulohazalarini bildirib o‘tdi.
Ko‘rsatuv andijonlik ayolning turmush o‘rtog‘i ota-onasining qistovi bilan boshqa bir ayolga uylanayotganiga bag‘ishlangan rolik bilan boshlandi. Shundan so‘ng bahs-munozaralar asosan shu ayolning taqdiri atrofida aylandi.
“Ikkinchi xotin olish uchun faqatgina moddiy mablag‘ning borligi, ikkisini ham kam-u ko‘st ta’minlab qo‘yishning o‘zigina kifoya emas. Bunda nafaqat moddiy tomondan, balki ma’naviy tomondan ham adolatli bo‘lish kerak. Agarda ikki xotin o‘rtasida har tomonlama adolat qilishga ko‘zingiz yetmasa uylanmang, chunki uning savol-javobi bor. 2014-yilda musulmonlar idorasi xotini ustida xotin olmoqchi bo‘lgan erkaklarga nikoh o‘qimaslik haqida fatvo chiqargan”, — dedi tok-shouda ekspert sifatida ishtirok etgan musulmonlar idorasi vakili.
Ko‘rsatuv ishtirokchilari tomonidan ko‘pxotinlik salbiy oqibatlarga olib kelishi, agarda savob yoki sunnat jihatidan ikkinchi marta xotin olish niyatida bo‘lsa nega boshqa beva-bechoralarni emas, yosh qizlarga uylanishayotganini, bularning barchasi o‘tkinchi nafsni qondirish uchun o‘ylamasdan qilinayotgan noto‘g‘ri xatti-harakat ekanligi ta’kidlandi.
“Mening oldimga ikkinchi xotin bo‘lib erga tekkan ayollar kelib turadi. Ularning aksariyati moddiy boylik uchun turmushga chiqqan. Eri olamdan o‘tib qolsa, birinchi xotini turmush o‘rtog‘ining marakalari bilan ovvora bo‘lgan bir paytda birinchi bo‘lib shular (ikkinchi xotin) kelib ‘Merosdan mening va bolalarimning ulushi qancha bo‘ladi, menga nima tegadi’ deb so‘raydi. Kechirasizu, qizlar, ayollar bu haqida ikkinchi xotin bo‘lib tegishdan oldin o‘ylash, surishtirish kerak edi”, — deydi notarial idora vakili.
Izoh (0)