2017 йилнинг 7 июль куни Ўзбекистон Республикаси Ташқи ишлар вазири Абдулазиз Комилов Франция Республикасининг Фавқулодда ва мухтор элчиси Виолен Биет де Вилморни қабул қилди. Бу ҳақда ТИВ матбуот хизмати хабар берди.
Учрашувда сиёсий, савдо-иқтисодий, молиявий-техник, сайёҳлик, маданий-гуманитар соҳаларда икки томонлама алоқаларни янада мустаҳкамлаш ва кенгайтириш истиқболлари муҳокама қилинди.
Таъкидланишича, француз инвестицияларини ва илғор технологияларини Ўзбекистон иқтисодиётининг қатор соҳаларига жалб қилиниши бажарилган ишларнинг муҳим натижаларидан бири бўлган. Хусусан, 2017 йил 16 майда «Ўзавтосаноат» АК ва Peugeot Citroen Automobiles гуруҳи ўртасида «Жиззах» эркин иқтисодий ҳудудида енгил тижорат автомобилларини ишлаб чиқариш бўйича қўшма корхона ташкил қилиш тўғрисида битим имзоланди.
6 июлда эса автомобиль заводи пойдеворининг тамал тошини қўйишга бағишланган тантанали тадбир бўлиб ўтди.
Мулоқот давомида бўлажак Ўзбекистон-Франция учрашувлари жадвали ва кун тартиби юзасидан ҳам фикр алмашилди.