Жорий йилнинг 12—17 июнь кунлари давомида «Тараққиёт стратегияси» маркази томонидан «Нотариат идоралари халққа хизмат қилиши керак» мавзусида жамоатчилик фикри сўрови ўтказилган эди.
Соҳадаги муаммоларни таҳлил қилиш ва аҳоли, тадбиркорлик субъектлари, кенг жамоатчиликнинг нотариат соҳасидаги фикр-мулоҳазаларини ўрганиш мақсадида ўтказилган сўровда Ўзбекистон Республикасининг барча ҳудудларидан жами 1104 нафар респондент иштирок этди. Иштирокчиларнинг кўпчилигини 58,1 фоизини Тошкент шаҳри ташкил қилди. Сўралган фуқароларнинг 15,1 фоизини хотин-қизлар ва 84,9 фоизини эркаклар ташкил этди.
Жамоатчилик фикри сўрови шуни кўрсатдики, сўров ўтказиш пайтида мамлакат фуқароларининг кўпчилиги (32,1 фоиз) сўров ўтказилган вақтга нисбатан нотариал идоралар хизматидан охирги бир ой ичида фойдаланганлар. Сўралганларнинг 21,6 фоизи охирги уч ой ичида, 15,3 фоизи охирги олти ой ичида, 26 фоизи охирги бир йил ичида, 0,2 фоизи фойдаланмаганлиги аниқланди.
Жамоатчилик фикри сўровини ўтказиш жараёнида нотариал идоралар томонидан хизмат кўрсатиш тартиб-таомиллари, нотариал хизматлар учун олинадиган давлат божи миқдорлари ҳақида фуқароларнинг қай даражада ахборотга эга эканликлари сўралди. Сўровнинг натижаларига кўра, респондентларнинг 33,4 фоизи (369 нафар) нотариал идоралар томонидан хизмат кўрсатиш тартиб-таомилларини, нотариал хизматлар учун олинадиган давлат божи миқдорларини билмасликлари, 33,1 фоизи (365 нафар) билишлари, 24,2 фоизи (267 нафар) нотариал хизматга ишлари тушганда консултация олиб, билиб олишларини билдиришган.
Респондентларнинг 5,3 фоизи (59 нафар) жавоб беришга қийналганлар, 4 фоизи (44 нафар) эса жавоб бермасликка қарор қилганлар.
Тез кунларда ўтказилган жамоатчилик фикри сўровининг яна бошқа натижалари билан кенг жамоатчиликни хабардор қилиш марказида Ўзбекистон Республикаси Адлия вазирлигининг тегишли мутассаддилари анжумани ўтказилиши режалаштирилган.