12 июнь куни Ўзбекистон Президенти Шавкат Мирзиёев ва Қозоғистон Президенти Нурсултон Назарбоев ўртасида телефон орқали мулоқот бўлиб ўтди. Бу ҳақда Ўзбекистон Ташқи ишлар вазирлиги матбуот хизмати хабар берди.
Шавкат Мирзиёев ўз ҳамкасбига жорий йилнинг 8—9 июнида Остонага Шанхай ҳамкорлик ташкилотига аъзо давлатлар раҳбарлари Кенгашининг йиғилишида иштирок этиш учун борган Ўзбекистон делегациясига кўрсатилган меҳмондўстлик ва илиқ қабул учун чуқур миннатдорчилик билдирди.
Суҳбат чоғида Қозоғистон пойтахтида ташкил этилган саммит ШҲТ фаолияти ривожида тарихий воқеа бўлгани алоҳида қайд этилди. Унинг муҳим натижаларидан бири сифатида Ҳиндистон ва Покистоннинг Ташкилотга тўла ҳуқуқли аъзо сифатида қабул қилингани таъкидланди. ШҲТ доирасида фаол ҳамкорликни давом эттиришнинг аҳамиятига алоҳида урғу берилди. Ўзбекистон раҳбари Қозоғистон томонини «Остона ЭКСПО — 2017» Халқаро кўргазмасини юқори даражада ташкил этилгани билан табриклади ва тадбирнинг муваффақиятли ўтишини тилади. Мазкур кўргазма минтақа мамлакатларига юқори технологиялар ва инвестицияларни жалб қилишда муҳим роль ўйнашига ишонч билдирилди.
Шунингдек, томонлар икки томонлама ҳамкорлик, халқаро ва минтақавий сиёсатнинг долзарб масалаларини кўриб чиқди.
«Суҳбат анъанавий илиқ ва дўстона муҳитда, ўзбек-қозоқ муносабатларига хос ўзаро тушуниш ва ҳурмат руҳида бўлиб ўтди», — дейилади ТИВ ахборотида.
Изоҳ (0)