Тошкент шаҳар ҳокими Раҳмонбек Усмоновнинг 1 июндаги қарорига (pdf) асосан, шаҳарда биринчи қаватида савдо комплекслари ва маиший хизмат кўрсатиш объектлари жойлашган кўп қаватли автотураргоҳлар қурилиши маъқулланди. Бу ҳақда «Газета.uz» хабар берди.
Дастлаб «шаҳарсозлик қоидалари ва санитария меъёрларига жавоб бермайдиган автомобилларни сақлаш иншоотлари» ўрнига кўп қаватли автотураргоҳлар қуриш режалари ҳақида апрель ойида маълум қилинган эди. Ўшанда автомобиль сақлаш жойларининг икки, уч ва олти қаватли дастлабки лойиҳалари намойиш этилган эди.
Ҳокимнинг кўп қаватли автотураргоҳлар қурилиши ҳақидаги қарори пойтахтда сўнгги икки йил ичида автотранспорт воситаларнинг сони 20 фоизга кўпайгани билан асосланган. 2017 йил 1 март ҳолатига пойтахтда 420,1 мингта автотранспорт воситаси мавжуд бўлган. Савдо марказлари ва тўйхоналар олдида машиналар қўйиш учун жойларнинг етишмаслиги эса йўлларда тирбандликларни юзага келтирмоқда.
Ҳужжатда туманлар ҳокимлари бошчилигида махсус ишчи гуруҳлар тузиш кўзда тутилган. Ишчи гуруҳлар талабларга жавоб бермайдиган автомобиллар турар жойларини ўрганиш, уларни бузиш, янги тураргоҳлар қуришга тадбиркорларни жалб қилиш, шунингдек, аҳоли ўртасида тушунтириш ишлари олиб бориш масалалари билан шуғулланади.
Ишчи гуруҳларга 2017 йилнинг охиригача супермаркет ва гипермаркетлар, шунингдек, тўйхоналар олдида автотураргоҳлар қуриш бўйича чоралар кўриш юкланган. Бунда олдида тураргоҳ қуриш имконияти бўлмаган объектлар эгаларига фаолият турини қайта кўриб чиқиш тавсия этилади.
Изоҳ (0)