Роналдуни қўлга киритиш истагидаги Хитой клуби «Реал»га 200, футболчига 120 миллион таклиф қилди

Мадриднинг «Реал» клуби ҳужумчиси Криштиану Роналдуни харид қилувчилар сони кенгайиб бормоқда, деб ёзди «Чемпионат».

Хитойнинг номи ошкор этилмаган клубларидан бири Роналду учун «Қироллик клуби»га 200 миллион евро таклиф қилган. Келишув амалга ошадиган бўлса, португалиялик ҳужумчи бўлажак клубидан йилига 120 миллион евро маош олади. Бу каби фантастик таклиф ҳозирга қадар ҳеч қайси футболчига билдирилмаган.

Қайд қилинишича, хитойликлар музокара столига ўтириш учун яқин кунлар ичида Мадридга етиб келади. Улар жамоа президенти Флорентино Переснинг ўзи билан юзма-юз гаплашиш истагида.

Аввалроқ Роналду учун Франциянинг «Монако» ва «ПСЖ», Англиянинг «Манчестер Юнайтед» клублари 180 миллион беришга тайёр экани айтилганди.