ОАВ: Филиппиндаги ИШИДга қарши жанговар ҳаракатлар давомида ўлдирилган жангарилар орасида чет элликлар ҳам бор

Филиппин қуролли кучлари томонидан Минданао провинциясининг Марави шаҳрида давом этаётган тўқнашувлар давомида ўлдирилган 13 нафар жангари орасида камида 2 нафар Малайзия, 3 нафар Индонезия фуқароси бўлган. Бу ҳақда маҳаллий махсус хизматларга таяниб, The Straits Times нашри маълум қилди, дея хабар беради «ТАСС». 

Ҳозирда расмий вакиллардан ҳеч бири Филиппинда ИШИД томонида жанг қилаётган хорижликларнинг аниқ сонини айта олмайди. 

Дастлабки маълумотларга кўра, бир неча кун ИШИД назорати остига ўтган Марави шаҳри атрофида 500 га яқин филиппинлик жангари бўлиб турибди. 

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.