Тожикистондаги «Иқтисодчи» журнали шундай сарлавҳа остида Ўзбекистонда қишлоқ хўжалиги маҳсулотларини совутгичларда сақлаш саноатининг ривожланишига бағишланган мақола чоп этилди. Бу ҳақда «Жаҳон» ахборот агентлиги маълум қилди.
Мақолада билдирилишича, «Умумжаҳон совутгич омборхона имкониятлари»нинг 2016 йилги ҳисоботига кўра, Ўзбекистон совутгич омборхоналар ҳажми бўйича энг яхши 20 мамлакат рўйхатига киритилди.
Журнал Умумжаҳон совутгич захиралари уюшмасининг халқаро дастурлар бўйича директори Ричард Трейсидан қуйидаги иқтибосни келтирган:
«Ўзбекистон қисқа вақт ичида юқори натижаларга эришди. Унинг бу соҳада дунё бўйлаб кучли 20 та мамлакат қаторига киргани қувонарлидир. Бу нафақат истеъмолчиларга йил давомида қишлоқ хўжалиги маҳсулотларидан баҳраманд бўлиш, балки фермерларга олис бозорларда ўз маҳсулотларини яхши нархларда сотиш имкониятини ҳам яратади. Ўзбекистон яқин келажакда ушбу соҳада энг яхши 10 та мамлакат қаторига қўшилади, деб умид қиламан».
Нашрга кўра, Ўзбекистон 2020 йил охирига қадар тизимнинг умумий сиғимини бир миллион тоннагача етказишни режалаштирмоқда. Ҳозирда мамлакатда бир пайтнинг ўзида 800 минг тоннадан ошиқ маҳсулот сақлаш имконини берадиган 1,3 мингдан ортиқ махсус омборхона мавжуд. Янги совутгич камералари пайдо бўлиши шарофати билан мамлакат мева-сабзавотлар йўқотилишини камида 10 фоизга қисқартиришни мўлжалламоқда.
Янги омборхоналар қурилишига 115 миллион доллар йўналтириладиган савдо-логистика марказлари таркибига киради. Ўзбекистоннинг барча ҳудудларида 15 та шундай марказ очилиши режалаштирилган. Янги совутгичлар ва омборхоналарнинг кўплаб барпо этилаётгани 2020 йилга келиб мамлакатда мева-сабзавот маҳсулотлари ишлаб чиқариш ҳамини икки баробар — йилига 32 миллион тоннагача ошириш вазифаси қўйилгани билан изоҳланиши таъкидланган.
Изоҳ (0)