Президент Шавкат Мирзиёевнинг «2017 — 2021 йилларда мактабгача таълим тизимини янада такомиллаштириш чора-тадбирлари тўғрисида»ги қарори билан тасдиқланган дастурни ўзбекистонликлар чиндан ҳам долзарб ҳисоблайди. Респондентларнинг мутлақ кўпчилиги, яъни 85,3 фоизи ушбу саъй-ҳаракатларни тўла қўллаб-қувватлашини билдирган. «Ижтимоий фикр» жамоатчилик фикрини ўрганиш маркази томонидан ўтказилган тадқиқот натижалари шундан далолат бермоқда.
Дастурга мувофиқ, 5 йил мобайнида мактабгача таълим муассасалари тармоғини 50 та янги қурилиш ҳамда мавжуд муассасаларнинг 1 минг 167 тасини реконструкция қилиш, 983 тасини мукаммал таъмирлаш орқали янада кенгайтириш аниқ мақсад сифатида белгилаб қўйилган. Бунинг учун жами 2,2 триллион сўм миқдорида маблағ ажратилиши кўзда тутилган.
Жорий йилнинг ўзида 301 мактабгача таълим муассасасида 265,4 миллиард сўмлик қурилиш-таъмирлаш ишлари олиб борилади. Мазкур комплекс тадбирларнинг бажарилиши натижасида болаларнинг мактабгача таълимга қамрови бир ярим баробар ошади. Бошқача айтганда, 2021 йилга бориб, республикада мактабгача таълим муассасалари 1 миллион 109 минг нафардан ортиқ болани ўз бағрига олади.
Ўзбекистонликларнинг фикрига кўра, мактабгача таълимни тубдан ислоҳ қилиш бўйича чора-тадбирлар ўз вақтида кўрилмоқда. Сўровда аён бўлишича, қишлоқ аҳолиси мактабгача таълим муассасалари моддий-техника ҳолатидан қониқмайди. Қишлоқ жойларда истиқомат қилаётганлар болалар боғчалари ёмон иситилиши, иссиқ сув таъминоти йўқлиги, бинолар таъмирталаб бўлиб қолганини маълум қилган.
Шаҳарлар, айниқса, пойтахт аҳолиси боғча ходимларининг болаларга эътиборсиз муносабати, болаларни мактабга тайёрлаш масалаларида тарбиячилар касбий савиясининг пастлигига кўпроқ эътибор қаратди.
Изоҳ (0)