Хабар қилинганидек, Ўзбекистон Республикаси Президенти Шавкат Мирзиёев Саудия Арабистони Подшоҳи Салмон ибн Абдул Азиз ол Сауд таклифига биноан 21 май куни Ар-Риёд шаҳрида Араб-мусулмон мамлакатлари ва Америка Қўшма Штатлари саммитида иштирок этади. Бу ҳақда «Жаҳон» ахборот агентлиги хабар бермоқда.
Юқори даражадаги ушбу форум экстремизм ва терроризмга қарши кураш, бағрикенглик, хавфсизлик, барқарорлик ва ҳамкорликни мустаҳкамлаш бўйича ислом дунёси ва АҚШ ўртасида янги шерикликни ўрнатиш йўлларини муҳокама этиш мақсадида ташкил этилмоқда.
Саммитга Ислом ҳамкорлик ташкилотига (ИҲТ) аъзо мамлакатлар, АҚШ, БМТ, ИҲТ, Араб давлатлари лигаси, Форс кўрфази араб давлатлари ҳамкорлик кенгашининг бош котиблари таклиф этилган.
Юқори даражадаги мазкур учрашув чоғида Саудия Арабистони подшоҳи, АҚШ президенти, бошқа давлатлар етакчилари, жумладан, Ўзбекистон раҳбарининг нутқ сўзлаши кутилмоқда.
Тадбир доирасида саммит қатнашчиларининг Экстремистик мафкура билан курашиш бўйича халқаро марказ қурилаётган жойга бориши ва унинг пойдеворига биринчи ғишт қўйилиши ҳам кўзда тутилмоқда.
Изоҳ (0)