Боку—2017. Ҳисобида 5 та олтин медали бор Ўзбекистон делегацияси 3-ўринга чиқиб олди

Боку мезбонлик қилаётган «Ислом бирдамлиги ўйинлари»нинг 14 май санасидаги мусобақаларида Ўзбекистон делегацияси 12 та медалга эга чиқди. Кеча — 13 май куни ўзбекистонлик спортчилар 8 та медаль билан кифояланганди.

Куннинг энг омадли спортчиси деб Анастасия Сердюковани кўрсатиш мумкин. Бадиий гимнастикачи булава машқида делегация ҳисобига иккинчи олтин медални ёзиб қўйди. Кейинроқ у ҳалқа ва копток билан машқларда иккита кумуш медалга эга чиқди. Бу борада Сердюкова Ўзбекистон делегациясининг энг олди спортчисига айланиб олди.

Дзюдо устаси Гулноза Матниёзова эса ҳисоб бўйича учинчи олтин медални қўлга киритди. -70 килограмм вазн тоифасида гиламга чиққан Гулноза барча рақибаларини ортда қолдиришга муваффақ бўлди.

Куннинг сўнгги икки мусобақасида пара-дзюдо усталари яна икки олтин медални келтирди. Аввалига Шуҳрат Бобоев, кейинроқ эса Ширин Шарипов барча рақибларини мағлуб этиб, ўз вазн тоифаларида шоҳсупанинг энг юқорисидан жой олди.

Бадиий гимнастикачилар делегация учун икки бронзани ҳам қўшиб қўйди. Булава ҳамда тасма машқларида Сабина Тошкенбоева жамоадоши Анастасия Сердюковадан кейинги поғоналарни банд этишга муваффақ бўлди. Аввалроқ ўзбекистонлик уч гимнастикачи жамоавий беллашувларда ҳам делегация учун медаль олиб берганди.

Шунингдек, оғир атлетиканинг 58 килограммгача бўлган спортчи қизлари ўртасидаги беллашувларида Муаттар Набиева учинчи натижа қайд этди. У 196 килограмм тошни ўзига бўйсундира олди.

14 май кунги медалчилар

КумушАнастасия Сердюкова — ҳалқадаги машқларАнастасия Сердюкова — коптокдаги машқлар

БронзаСабина Тошкенбоева — тасмадаги машқларСабина Тошкенбоева — булаваАбдулазиз Отабоев — каратэДавлатбек Бобонов — дзюдоМуаттар Набиева — оғир атлетикаФеруз Саидов — пара-дзюдо

Шу тариқа Ўзбекистон делегацияси 5 та олтин, 4 та кумуш ва 12 та бронза медали билан умумжамоа ҳисобида учинчи ўринга кўтарилиб олди. Пешқадамлик мезбон Озарбайжоннинг ўзида, уларни Туркия делегацияси таъқиб қилмоқда.