Европа Чемпионлар лигасининг ярим финалидан жой олган «Ювентус» — «Монако» ўйини туринлик футболчиларнинг 2:1 ҳисобидаги ғалабаси билан якунига етди.
Бунда «Ювентус» ҳар икки ўйинда ҳам ғолиб чиқиб, финалга йўлланма олган бўлса-да, монаколиклар клубнинг 690 дақиқадан буён давом этиб келаётган қуруқ сериясига якун ясаб берди.Килиан Мбаппе
«Монако»нинг плей-оффдан жой олган дастлабки тўрт ўйинининг ҳар бирида гол урган 18 ёшли ҳужумчи рекорд қайд этганди. Яъни, нимчорак ва чорак финалнинг жами 4 та ўйинида гол уриш ҳозиргача ҳеч бир футболчига насиб қилмаганди.
Энди эса Мбаппе Чемпионлар лигасининг ярим финалида гол урган энг ёш футболчига айланиб олди. 18 ёш-у 140 кунлигида дунёнинг ҳеч бир футболчиси энг нуфузли турнир ярим финалида муваффақият қозонмаган, деб эътироф этди УЕФА расмий сайти.
Қизиқ томони, Мбаппе гол урган дарвозабон Буффон ҳозир 39 ёшда. Машҳур посбон футболчилик фаолиятини бошлаганида Мбаппе ҳали дунёга келмаганди.
Жанлуижи Буффон
«Ювентус»нинг финалга чиқишида катта меҳнат қилган 39 ёшли дарвозабон еврокубоклардаги 150-учрашувида майдонга тушди ва айнан юбилей ўйинида ўғли тенги футболчидан гол ўтказди.
Бунга қадар яна 9 нафар футболчи еврокубокларда 150 та ўйин ўтказган деб маълумот берди УЕФА. Италиялик бошқа бир футболчи Паоло Мальдини ҳисобида 174 та ўйин бор.
Бу борада рекорд «Реал»нинг собиқ, «Порто»нинг айни пайтдаги дарвозабони Икер Касильясга тегишли — 175 та ўйин.
«Ювентус»
Турин клубининг Чемпионлар лигасидаги қуруқ серияси 690 дақиқа давом этгани айтилди. Бу борада «Ювентус» шунга яқин натижалар қайд эта олган «Милан», «Аякс», «Челси» каби клубларни ортда қолдирди.Бироқ 690 дақиқа энг яхши кўрсаткич эмас. 2005/06 йилги мавсумда Лондоннинг «Арсенал» клуби ўз дарвозаси даҳлсизлигини 995 дақиқа давомида сақлай олган. Беш дақиқаси кам минг минут гол ўтказмаган Арсен Венгер рекордини шу билан ким янгилашини вақт кўрсатади.
Изоҳ (0)