Смартфонларнинг дунё бўйича савдоси 2017 йилнинг биринчи чорагида ўтган йилнинг шу даврига нисбатан 4,3 фоизга ўсиб, 347,4 миллион донани ташкил қилди.
Бироқ етакчилар Samsung ва Apple’нинг бозордаги ҳиссаси камайган. Уларнинг хитойлик рақобатчилари Huawei, Oppo ва Vivo эса савдо ҳажмини оширишга муваффақ бўлган, дея хабар бермоқда Insider Pro.
Samsung аввалгидек биринчи ўринни эгаллаб турибди. Унинг савдо ҳажми бир фоизга камайган ва сотилган смартфонлар сони 79,2 миллион донани ташкил қилган.
Компания Galaxy S7 ва Galaxy S7 Edge смартфонларига чегирмалар жорий этган, эндиликда Galaxy S8 ва Galaxy S8 Plus савдода етакчилик қилиши кутилмоқда.
Apple’нинг ҳиссаси 14,9 фоизгача қисқарган ва 51,6 миллионта смартфон сотилган. Чорак охирида бозорга iPhone SE ва қизил iPhone 7 чиқарилди, бироқ улар савдонинг ўсишига жиддий таъсир кўрсата олмади.
Шу билан бир вақтда, «хитойлик учлик» савдо ҳажмини оширишда давом этмоқда. Ўтган йили Oppo ва Vivo биринчи марта Lenovo ва Xiaomi’ни тўртинчи ва бешинчи ўринлардан пастга туширишга муваффақ бўлди.
Уларнинг бозордаги ҳиссаси нисбатан катта бўлмаса ҳам, ўсиш суратлари Америка ва Кореядаги рақобатчиларидан кўп марта юқори.
Huawei, Oppo ва Vivo харидорларга Samsung ва Apple каби замонавий смартфонлар таклиф қилмоқда. Бироқ уларнинг нархи нисбатан арзон ва бу компаниялар муваффақиятининг гарови бўлмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)