Тадқиқотчилар Антарктидадаги қип-қизил шаршара қандай пайдо бўлганини аниқлашга бир асрдан кўпроқ вақт сарфлади, деб ёзади «Naukatv.ru».
Шарқий Антарктиданинг Мак-Мердо қуруқ водийларидаги Тейлор музлигидан оқиб тушувчи шаршара биринчи марта 1911 йилда аниқланган. Дастлаб қизил ранг майда қизил сувўтлари туфайли келиб чиққанлиги тахмин этилганди. Аммо 2003 йилда тадқиқотчилар сувга занг тусидаги қизғиш рангни темир оксиди бераётганини аниқлади.
Энди олимлар ҳатто паст ҳароратда ҳам тўхтаб қолмайдиган ғалати сув оқими қаердан тушаётганини билиб олди. Маълум бўлишича, шаршара музликлар ичида 1 миллион йил давомида қолиб кетган кўлдан бошланади. Бу ҳақда Аляска университети ва Колорадо коллежи олимларининг тадқиқотларида айтилади. Улар сувнинг қаердан бошланганини эхолокация ёрдамида аниқлади.
Тейлор музлиги — жуда совуқ бўлиб, ундан сувнинг қандай оқиб ўтиши ҳайратланарли. Занг рангидаги суюқлик кўлдан Қонли шаршарагача бўлган йўлда музлаб қолмаслиги сабабларидан бири — таркибида юқори даражада туз борлиги.
Изоҳ (0)