Ўзбекистонда мактаб ўқувчилари эндиликда «Меҳнат таълими» фанини эмас, «Технология» фанини ўрганади

Ўзбекистон Миллий матбуот марказида таълим сифати ва самарадорлигини юксалтиришга оид амалий ишлар ва истиқболдаги устувор вазифаларга бағишланган матбуот анжумани бўлиб ўтди, деб хабар беради ЎзА.

Анжуманда мажбурий таълим тизими учун (9+3 асосидаги) 18 умумтаълим фанидан давлат таълим стандартлари ишлаб чиқилгани қайд этилди. Хусусан, мантиқий фикрлаш қобилиятини ривожлантириш мақсадида жисмоний тарбия фанидан давлат таълим стандартларига шахматни ўрганиш талаблари сингдирилди. 1—4-синфларда математика фанини ўқитиш мазмунига дастурлашнинг илк тушунчалари киритилгани ўғил-қизларда информатика, ахборот технологиялари фанига оид бошланғич билимларни шакллантиради.

Ўқув режаси ҳам янада такомиллаштирилиб, «Информатика ва ҳисоблаш техникаси асослари» фани «Информатика ва ахборот технологиялари» деб ўзгартирилди. Ўқувчиларни касб-ҳунарни тўғри танлашга йўналтириш мақсадида «Меҳнат таълими» фани «Технология» фани деб ўзгартирилди ва бугунги кун талабидан келиб чиқиб, кўп тармоқли йўналишларга асосланган ҳолда қайта ишланди.

Матбуот анжуманида ОАВ ходимларининг саволларига жавоб қайтарилди.

«Дарё»нинг Telegram’даги расмий канали — @toshqindaryo’га аъзо бўлинг!