«Ўзбекистон ҳаво йўллари» миллий авиакомпанияси бепул гуманитар дастурларни амалга оширгани учун AmeriCares Халқаро ташкилотининг фахрий ёрлиғи билан тақдирланди. Бу ҳақда «Дарё»га миллий авиакомпаниянинг ахборот хизмати маълум қилди.
Авиакомпания раҳбарияти, ходимлари ва AmeriCares Халқаро ташкилотининг халқаро ҳамкорлик ва дастурлар бўйича вице-президенти Р.Гренжер, Глобал ҳамкорлик бўлимининг Евроосиё дастурлари бўйича директор ўринбосари Д.Попов, «Соғлом авлод учун» жамғармасининг бошқарув раиси ўринбосари Э.Бриггс иштирокида бўлиб ўтган учрашувда гуманитар дастурларни амалга ошириш масалалари муҳокама қилинди.
Гуманитар ёрдамларни ташкил қилиш ва етказиб бериш бўйича масалаларни муҳокама қилиш билан бир қаторда AmeriCares вакиллари миллий авиакомпанияга гуманитар дастурларни амалга ошириш ва «Соғлом авлод учун» жамғармасига йўналтирилган гуманитар юкларни бепул ташишдаги кўмаги учун миннатдорчилик билдирди. Ташиладиган гуманитар юклар Ўзбекистоннинг шаҳар ва вилоятларидаги даволаш-профилактика муассасаларига тарқатилиши таъкидланди.
AmeriCares Халқаро ташкилоти нотижорат халқаро инсонпарварлик ташкилоти бўлиб, соғлиқни сақлаш ва фавқулодда вазиятларда ёрдам кўрсатиш соҳаларида узоқ муддатли дастурларни амалга оширади. «Ўзбекистон ҳаво йўллари» МАК ташкилот билан 2009 йилдан бери муваффақиятли ҳамкорлик қилиб келмоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)