Нима учун Англияда сув учун 2 та жўмрак ўрнатилади?

Дунё ўзга маданият вакиллари учун ғалати кўринадиган анъаналарга бой. AdMe нашри нима учун Англиядаги раковиналарда иккита жўмрак бўлиши билан қизиқди.

Тарихийлик

Британиядаги уйларнинг катта қисми XIX аср охири ва ХХ аср бошига тааллуқли бўлиб, у даврда замонавий жўмраклар яратилмаган эди. Ички сантехника жорий этилганда тизим оддий бўлган ва фақат совуқ сув тармоқдан тўғри ошхонага уланган. Кейинчалик алоҳида иссиқ сув тизими қўшилган ва иккита тизим пайдо бўлган.

Қонунга риоя қилиш

Англияда мавжуд қонунга кўра совуқ сув ва сув иситгичдаги қайноқ сувни аралаштириш тақиқланади. Гап шундаки, мамлакатда марказий иситиш тизими мавжуд эмас ва ҳар бир уйда алоҳида газ ёрдамида иситиладиган қурилма бор. Англияликлар бу қурилмани марказий иситиш тизими деб атайди. Аввал сув иситгичда алоҳида сув тўплайдиган цистерна бўлиши керак бўлган. Сув цистернада узоқ вақт қолиб кетган ва идиш занглаб, сув ичиш учун яроқсиз ҳолга келган. Кўплаб кишилар бу ҳолатнинг олдини олмаган. Натижада ичиш учун яроқли сувни ва идишда тўпланган қайноқ сувни аралаштиришни тақиқловчи қонун қабул қилишга тўғри келган.

Анъаналарга амал қилиш

Англияликлар оқаётган сувда қўл ювмайди. Аввал улар раковина тубини тиқин билан ёпиб, уни сув билан тўлдиради ва кейин қўлни совунлаб ювади. Шундан сўнг тиқинни олиб, қўлни сочиқ билан артади. Бунда улар қўлни чаймайди. Улар шу тарида ювинади ва идишларни ҳам ювади, чаймасдан қуритади.

Тежамкор ёндашув

Иккита алоҳида жўмракдан фойдаланишда сув керакли миқдорда аралаштирилади ва унда қўл ювилади. Шу тариқа фақат фойдаланилган сув сарф қилинади. Икки жўмракни бирданига ишга туширадиган қурилма бўлганда эса сув керакли ҳароратга келганидан сўнг қўл ювилади ва бунда керагидан ортиқча сув сарфланади.

 «Дарё»нинг Telegram’даги расмий канали — @toshqindaryo’га аъзо бўлинг!