Маҳаллий расмийларнинг хабар беришича, Колумбиянинг Мокоа шаҳрида 1 апрель, шанба куни юз берган сув тошқини қурбонлари сони 300 кишидан ошди. Юзлаб кишилар ҳалигача бедарак кетган деб ҳисобланмоқда. Бу ҳақда «Корреспондент.net» хабар берди.
Камида 2,5 минг киши вақтинчалик бошпаналарда жон сақламоқда. Колумбия ҳукумати юз берган ҳодиса юзасидан тергов олиб боришга буйруқ берди. Терговчилар қурилиш меъёрларига етарлича эътибор берилганми ёки йўқлиги ҳамда мансабдорларнинг табиий офат вақтида ҳаракатланишга қанчалик тайёрланганлигини аниқлаши керак. Мокоа шаҳрининг баъзи туманлари ҳалигача сувсиз ва электр энергиясисиз қолмоқда.
Қутқарувчилар вайроналар остида қолиб кетган қурбонларни излашда давом этмоқда. Қидирув-қутқарув операциясида 1100 дан ортиқ аскар ва полициячилар қатнашмоқда.
Қутқарувчиларнинг хабар беришича, ноқулай об-ҳаво қидирув ишларини қийинлаштирмоқда. Шунингдек, жабр кўрган туманларга етиб бориш ҳам қийинлашган, ҳудуддаги кўплаб кўприклар бузилган ва йўллар зарарланган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)