Наманган шаҳрининг баъзи кўчаларида кундузи Damas автомобилларининг ҳаракатланиши тақиқланди

Наманган вилоят ҳокими Хайрулло Бозоров аҳолига қўшимча қулайликлар яратиш ҳамда хизмат кўрсатувчи корхоналар ишини мувофиқлаштириш мақсадида фармойиш қабул қилди, деб ёзади «Namnews.uz».

Ушбу фармойиш билан Наманган шаҳар ҳокимлиги ҳамда Ўзбекистон автомобиль ва дарё транспорти агентлиги вилоят бўлимининг Наманган шаҳридаги «Чорсу», «Сардоба» бозорлари, Темир йўл вокзали ҳудудларида, А. Навоий, Б. Машраб, А. Темур кўчаларида транспорт оқимини тартибга солиш, тирбандликни бартараф этиш, йўл-транспорт ҳодисаларининг олдини олиш, йўл қопламалари ва транспорт тўхташ жойларини таъмирлаш ишларини якунлаш мақсадида мулкчилик шаклидан қатъий назар жорий йилнинг 25 мартидан бошлаб ҳар куни соат 7:00 дан 20:00 га қадар Темир йўл вокзалидан А. Навоий кўчаси орқали Чорсу бозоригача ҳамда Темир йўл вокзалидан А. Темур ва Б. Машраб кўчалари орқали Чорсу бозоригача махсус транспорт воситаларидан (101, 102, 103, 104 ва 105) ташқари Damas русумли транспорт воситаларининг ҳаракатланишини тўхтатиш тўғрисидаги таклифларига розилик берилди.

Тузилган ишчи гуруҳи (Т. Дадабоев), Наманган шаҳар ҳокимлиги (Б. Бекхўжаев), Ўзбекистон автомобиль ва дарё транспорти агентлиги вилоят бўлими (А. Абдулҳодиев), вилоят ИИБ ЙҲХБ (И. Қобулов), вилоят Давлат солиқ бошқармаси (А. Ҳакимов), Наманган шаҳар ИИБ (М. Дадажонов) ларга шаҳар ички йўналишларида қатнайдиган йўловчи ташиш транспорти хизматларини янада яхшилаш мақсадида, Наманган шаҳар комиссияси томонидан белгиланган йўналишларда Ўзбекистонда ишлаб чиқарилган Isuzu русумли автобусларининг жадвал асосида мунтазам ҳаракатланишини таъминлаш топширилди.

Вилоят молия бошқармаси, хусусийлаштириш, монополиядан чиқариш ва рақобатни ривожлантириш бошқармасига бир ҳафта муддатда автобус йўловчи ташиш транспорти хизматларининг чекланган тарифлари, шу жумладан, айрим фуқаролар (мактаб, лицей ва коллеж ўқувчилари, пенсионер, ногирон)ларга имтиёз масалаларини йўловчи ташишнинг амалда шаклланаётган харажатларини қоплашни таъминлашни ва аҳоли манфааларига риоя қилишни ҳисобга олган ҳолда қайта кўриб чиқиш ва вилоят ҳокимлигига таклиф киритиш вазифаси юклатилди.

Наманган шаҳар ҳокимлиги, Марказий банк вилоят бош бошқармаси, Ўзбекистон автомобиль ва дарё транспорти агентлиги вилоят бўлими, вилоят Давлат солиқ бошқармасига 2017 йилнинг 1 октябрига қадар Наманган шаҳрида йўловчилар ташиш транспортида йўл кира ҳақи учун нақд пулсиз ҳақ тўлаш тизимининг жорий этилишини таъминлаш вазифалари топширилди.

«Дарё»нинг Telegram’даги расмий канали — @toshqindaryo’га аъзо бўлинг!