Шавкат Мирзиёев дунёнинг энг яхши 100 ёш иқтисодчиси рўйхатидан ўрин олган Рауф Салахўжаевга уй совға қилди

Дунёнинг энг яхши 100 нафар ёш иқтисодчиси рўйхатига киритилган Рауф Салахўжаев Ўзбекистон Президенти Шавкат Мирзиёевдан совға олди. Бу ҳақда «Газета.uz» хабар бермоқда.

Бу ҳақда «Ўзбекистон» телеканалининг «Таҳлилнома» дастурида маълум қилинишича, Тошкентдаги Халқаро Вестминстер университети ўқитувчиси Рауф Салахўжаевга Президент номидан Тошкент шаҳри марказида жойлашган уй совға қилинди.

Аввалроқ Рауф Салахўжаев RePeC (Research Papers in Economics — «Иқтисод фани бўйича Илмий мақолалар») ташкилоти томонидан тузилган дунёнинг энг яхши 100 нафар ёш иқтисодчиси рўйхатига киритилгани ҳақида хабар қилган эди.

Ўзбекистон вакили илк бор ушбу рўйхатга киритилиб, 32-поғонадан жой олди. У биринчи элликталикдан ўрин эгаллаган ягона МДҲ вакили ҳисобланади. Кучли элликталикка Рауф Салахўжаевдан ташқари Осиёнинг яна икки вакили — Ҳиндистон ва Япония иқтисодчилари киритилган.

«Мен учун бу энг аввало Ўзбекистонда мамлакат ва унинг раҳбарияти қадрлайдиган ҳамда ғамхўрлик кўрсатадиган олимлар борлигини бутун дунёда билишлари учун янада кўпроқ ишлаш, барча кучимни келгусидаги илмий муваффақият ва ғалабаларга бағишлашимга рағбат ва иштиёқдир», — деди Рауф Салахўжаев телеканалга берган интервьюсида.

«Дарё»нинг Telegram’даги расмий канали — @toshqindaryo’га аъзо бўлинг!