Қадимги аборигенлар Австралияда тахминан 50 минг йил аввал пайдо бўлган. Тарихий белгиларга кўра, уларнинг қабилалари қитъада жуда тез тарқалиб, ўрнашиб олгандан сўнг ҳеч қаерга қўзғалмаган. Бу ҳақда «ТАСС» хабар берди.
Бундай хулоса Аделаида университети олимлари томонидан 111 нафар аборигеннинг соч толалари ДНКсининг чуқур таҳлилидан сўнг берилди. Соч толалари 1928—1970 йилларда Квинсленд ва Жанубий Австралия штатларида олиб борилган антропологик экспедициялар вақтида йиғилган. Экспедициядан сўнг соч толалари Жанубий Австралия табиий тарих музейида сақланган. Олимлар тадқиқотни Яшил қитъанинг туб аҳолиси ташкилотлари раҳбарларидан тегишли рухсатномани олганидан сўнг, яқин йилларда бошлади.
«Биз митохондриал ДНК таҳлили натижаларини Австралия ҳудудидаги одамнинг энг машҳур қадимги манзиллари ҳақидаги маълумотлар билан таққосладик. Аборигенларнинг аждодлари Австралияга тахминан 50 минг йил аввал ҳозирги Папуа-Янги Гвинея ҳудудидан келиб ўрнашган, — деб ҳикоя қилади тадқиқот муаллифларидан бири профессор Алан Купер. — Кейин эса улар икки гуруҳга бўлиниб, қитъанинг қирғоқбўйи ҳудудларини эгаллай бошлади. Қабилаларнинг биринчи гуруҳи соат мили йўналишида, иккинчи гуруҳи эса тескари йўналишда ҳаракатланган. Тахминан 1000—5000 йилдан сўнг гуруҳлар қитъа жанубида учрашди. Шундан сўнг ҳеч қандай йирик кўчиш юз бермаган».
Купернинг фикрига кўра, ўтказилган тадқиқот натижалари аборигенларнинг ўтроқ бўлиб яшаши ва туғилган жойига боғланиб қолиши каби кўплаб европаликларга ғалати туюладиган одатларига ойдинлик киритади.
«Улар бу ерда узоқ йиллардан буён яшамоқда ва кўплаб экологик ҳодисаларга гувоҳ бўлди. Шунинг учуин уларнинг ҳаёти ўзи яшаётган ҳудудга бевосита боғлиқ. Чунки улар айнан ўзи туғилган жойда иқлим ўзгаришларини қандай енгиб ўтишни яхши билади», — деб тушунтиради олим.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)