Халқ таълими вазирлиги ўқувчиларнинг билим олишга қизиқишини шакллантириш, уларда мутолаа маданиятини тарбиялаш, китобхонликни ривожлантиришга инновацион ёндашувларни татбиқ этиш мақсадида «Оммавий китобхонлик ҳафталиги»ни ўтказмоқда. Бу ҳақда Халқ таълими вазирлиги ахборот хизмати «Дарё»га маълум қилди.
Ҳафталик шу йилнинг 3—8 апрель кунлари республикадаги барча умумтаълим мактаблари, ахборот-ресурс марказларида ўтказилади. Ҳафталик доирасида илмий-амалий конференциялар, давра суҳбатлари, таниқли болалар шоир ва ёзувчилари билан ижодий учрашувлар, янги адабиётлар кўргазмалари, маҳорат сабоқлари, турли танловлар, викториналар, интеллектуал ўйинлар ташкил этилади.
Мазкур лойиҳанинг асосий вазифаси ахборот-кутубхона муассасалари ва мактаб кутубхоналарида ўқувчиларнинг бўш вақтларида китоб мутолаа қилишларига шароит яратиш, китобхонликни энг муҳим маданий эҳтиёж сифатида оммалаштириш, ўқувчиларда китобхонликка бўлган меҳрни ўйғотиш, оилада ва таълим муассасасида мутолаа муҳитини юзага келтириш ва ижодкор ўқувчиларни тақдирлашдан иборат.
Ҳафталик якунлари бўйича унда фаол иштирок этган ўқувчилар эсдалик совғалари билан тақдирланади.
Изоҳ (0)