2017 йил 24 февраль куни Инсон ҳуқуқлари бўйича Ўзбекистон Республикаси Миллий марказида мазкур Миллий марказ, Одам савдосига қарши курашиш бўйича Республика идоралараро комиссияси ва Миграция бўйича халқаро ташкилотнинг Марказий Осиё бўйича мувофиқлаштирувчи офиси ҳамкорлигида Одам савдосига қарши курашиш юзасидан қўшма чора-тадбирлар режаси доирасида нашр этилган «Одам савдоси ва унга қарши курашиш» номли амалий қўлланма тақдимоти ўтказилди. Бу ҳақда Инсон ҳуқуқлари бўйича Ўзбекистон Республикаси Миллий маркази матбуот хизмати хабар бермоқда.
Тадбирда одам савдоси бир вақтнинг ўзида жаҳон ҳамжамиятини ҳам, ҳар қайси алоҳида давлатни ҳам бирдек ташвишга солаётган долзарб муаммолардан бири эканига эътибор қаратилди. Халқаро ташкилотлар маълумотларига қараганда, дунёда ҳар йили 4 миллионга яқин инсон замонавий шакллардаги қуллик қурбони бўлмоқда.
Одам савдоси асосан халқаро миқёсдаги трансмиллий жиноий гуруҳлар томонидан содир этилаётган кирдикор бўлиб, бунда уларга дунё миқёсидаги глобалллашув ва шу омил билан узвий боғлиқ бўлган назорат қилиб бўлмайдиган миграция қўл келмоқда.
Ўзбекистон Республикаси инсон ҳуқуқ ва эркинликларига доир 70 дан зиёд халқаро ҳужжатга қўшилган. Бу халқаро-ҳуқуқий ҳужжатлар нормалари бугунги кунда мамлакат фуқароларининг сиёсий, иқтисодий, ижтимоий ва маданий ҳуқуқларини тартибга солувчи 700 дан ортиқ қонун ва 16 та кодексга имплементация қилинган.
Ўзбекистон одам савдосига қарши курашиш соҳасидаги ҳаракатларни мувофиқлаштириш мақсадида БМТ, ЕХҲТ ва Миграция бўйича халқаро ташкилот ваколатхоналари билан ўзаро ҳамкорликда изчил фаолият олиб бормоқда. Бундай яқин ҳамкорлик одам савдосининг олдини олиш ва унинг қурбонларини ҳимоя қилиш соҳасида қўшма лойиҳа ҳужжатларини биргаликда амалга ошириш мисолида айниқса яққол намоён бўлмоқда.
Инсон ҳуқуқлари бўйича Ўзбекистон Республикаси Миллий марказида бўлиб ўтган тақдимот иштирокчилари «Одам савдоси ва унга қарши курашиш» номли амалий қўлланмада одам савдоси билан боғлиқ асосий тушунчалар, меҳнат миграциясининг турлари, хорижга чиқиш ва яшаш, шу билан бирга одам савдосига қарши курашиш соҳасидаги миллий қонунчиликнинг мазмун-моҳияти чуқур очиб берилганига эътибор қаратдилар. Айниқса, одам савдоси қурбонларига ёрдам кўрсатиш механизмлари содда ва тушунарли тилда баён қилинган.
Қўлланмада, шунингдек, одам савдосига қарши курашиш масалалари билан шуғулланувчи давлат органлари, Ўзбекистон фуқаролари нисбатан кўпроқ борадиган муайян хорижий давлатлардаги элчихона ва консуллик хизматлари, Миграция бўйича халқаро ташкилотнинг хориждаги бўлинмаларига мурожаат қилиш учун зарур маълумотлар ҳавола этилган.
Тадбир якунида «Марказий Осиёда одам савдосига қарши курашиш» лойиҳасини амалга ошириш доирасида Миграция бўйича халқаро ташкилотнинг Марказий Осиёдаги мувофиқлаштирувчи офиси томонидан Инсон ҳуқуқлари бўйича Ўзбекистон Республикаси Миллий марказига одам савдоси билан крашишга тааллуқли махсус адабиётлар ва жиҳозлар тақдим этилди.
Тақдимотда Ўзбекистон Республикаси Олий Мажлиси депутатлари ва сенаторлари, тегишли вазирлик ва идоралар, маърифий ва илмий муассасалар, инсон ҳуқуқлари ва эркинликларини таъминлашда иштирок этувчи нодавлат нотижорат ташкилотлари вакиллари қатнашди.
Изоҳ (0)