Telegraph Россиянинг Черногорияда фитна уюштиришга алоқадорлигини маълум қилди

Буюк Британия ҳукуматидаги аноним манба Черногориянинг собиқ бош вазири Мило Жукановичга суиқасд қилиш ва мамлакатда давлат тўнтаришини амалга ошириш режасига гўёки Россия махсус хизматлари алоқадор эканлигини таъкидламоқда. Бу ҳақда Telegraph газетаси маълум қилмоқда, деб ёзади «РИА Новости».

Аввалроқ Россия бу каби тахминларни рад этган, Черногория прокуратураси эса Россия Федерацияси ҳукуматининг ушбу ҳодисаларга алоқадорлиги бўйича далиллар мавжуд эмаслигини маълум қилган эди.

Telegraph’нинг Британия ҳукуматидаги аноним манбаси таъкидлашича, Жукановичга нисбатан суиқасд гўёки Россия разведка ходимлари томонидан тайёрланган. Газетанинг таъкидлашича, бундан мамлакатнинг НАТОга қўшилиш режасига тўсқинлик қилиш мақсади кўзланган.

Telegraph фитна амалга оширилишига бир неча соат қолганда тўхтатиб қолинганлигини эслатиб ўтади. Мақола муаллифининг маълум қилишича, АҚШ ва Буюк Британия разведка хизматлари «Россия аралашуви»нинг далилларини тўплаган. Мазкур ишда гўёки шифрланган қўнғироқлар, электрон хатлар ва маълумотга эга манбаларнинг кўрсатмалари мавжуд.

Кремль Россия Федерациясининг Жукановичга суиқасд қилишга уринишга алоқадорлиги ҳақидаги маълумотни тўлиқ рад этди. «Дарё»нинг Telegram’даги расмий канали — @toshqindaryo’га аъзо бўлинг!