КХДР етакчиси Ким Чен Иннинг акаси Ким Чон Намга нисбатан уюштирилгани тахмин этилаётган суиқасдда гумонланаётган Индонезиянинг 25 ёшли фуқароси Сити Айсиа ўз оиласига Япония телеканали учун кўнгилочар кўрсатувни суратга олишда қатнашаётганини айтган. Бу ҳақда аёлнинг опасига таяниб, Mainichi газетаси хабар берди, деб ёзади «ТАСС».
Унинг сўзларига кўра, Айсиа Индонезиянинг Батам оролида аёллар ич кийимлари дўконида ишлаган ва январь охирида яқинларига кўнгилочар кўрсатув иштирокчиси сифатида вақтинчалик иш топганлигини маълум қилган. «Сценарий» бўйича у қизил қалампирни олиб, ҳазил объектига айланган кишининг юзига суриши керак бўлган. Аммо «шоу»ни аёл томоша қила олмаган, чунки уни кўрсатув фақат Японияда эфирга узатилишига ишонтиришган эди.
NTV телеканали хабарига кўра, Айсианинг оила аъзолари айтиб беришича, у аввал ҳам бундай «ҳазил кўрсатувларда»да қатнашган.
Ким Чон Намнинг ўлдириб кетилиши ҳақидаги иш бўйича тўрт киши ҳибсга олинди. Улар орасида Айсиа ва 29 ёшли вьетнамлик қиз ҳамда улардан бирининг яқин таниши бор, улар жиноий режанинг ижрочилари дея тахмин этилмоқда. 18 февраль, шанба куни эса Шимолий Корея паспортига эга 47 ёшли эркак қўлга олингани маълум бўлди, уни Малайзия ОАВлари қотиллик ташкилотчиларидан бири деб атамоқда. Айни пайтда полиция яна уч эркакни қидиришда давом этмоқда.
Изоҳ (0)