Марк Цукерберг ва унинг рафиқаси Присцилла Чан асос солган Biohub тиббиёт илмий-тадқиқот маркази соғлиқни сақлаш соҳасидаги тадқиқотлар учун биринчи 50 миллион доллар ажратилишини маълум қилди. Бу ҳақда «Коммерсантъ» хабар бермоқда.
Biohub Стэнфорд, Беркли ва Сан-Францискодаги Калифорния университетлари билан ҳамкорлик доирасида ташкил этилган. Асос солинганидан бери марказга лойиҳаларда иштирок этиш учун 700 га яқин талабнома келиб тушди.
Улар орасидан 47 олим танлаб олинди ва 5 йил мобайнида тадқиқотларини амалга ошириши учун 1,5 миллион доллардан ажратиб берилди.
Марказ фақат бир касалликка эътибор қаратиб қолмайди, мутахассислар исталган йўналиш — аъзоларни 3D принтерда чоп этишдан тортиб тўқималарнинг пайдо бўлиши жараёнигача ўрганиши мумкин.
Эслатиб ўтамиз, Цукерберг ва унинг рафиқаси Присцилла ўтган йили соғлиқни сақлаш соҳасидаги тадқиқотлар учун 10 йил давомида 3 миллиард доллар маблағ хайрия этишини эълон қилганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)