Лондон тимсолларидан бирига айланган қизил тусдаги телефон будкалари тарихда қолди. Энди улар қора бўлади (фото)

New World Payphones компанияси Лондон ва Буюк Британия рамзларидан бирига айланган қизил рангдаги телефон будкаларининг янги дизайнини тақдим этди, деб TJournal хабар берди.

Ўрнатилганига салкам 1 аср бўлган классик телефон будкалари ўрнини замонавий кўринишдагиси эгаллайди. Янги будкада эскисидаги каби ёпиладиган эшик йўқ, шунингдек, машҳур қизил ранг қорага алмаштирилган. Телефон автомати билан бир қаторда, янги будкаларда улар жойлашган ҳудудлар ҳақида маълумот берувчи сенсорли дисплейлар ва Virgin Media компаниясининг Wi-Fi қурилмалари жойлаштирилади.

New World Payphones’га эгалик қилувчи компания бош директори Жастин Кокрейннинг сўзларига кўра, янги будкалар йирик кўчаларни эски алоқа воситаларидан сезиларли даражада бўшатишга имкон беради. Бўшаган жойлар ўрнини янги экилган дарахтлар эгаллайди. Шунингдек, ишлаб чиқилган лойиҳа янгиланган «телефон қутилари»ни тайёрлаш билан шуғулланувчи маҳаллий ишлаб чиқарувчиларни имтиёзлар орқали қўллаб-қувватлайди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.