Ўзбекистонлик 200 га яқин қиз мамлакатда илк бор ўтказилаётган Technovation Challenge халқаро танловида иштирок этади. 3 ой давомида улар шаҳар, туман ёки маҳалладаги муаммоларни ечишга қаратилган ижтимоий мобил дастурини ишлаб чиқиши талаб этилади, дея хабар беради «Газета.uz».
Technovation Challenge технологик ишланмаларнинг фақат 15 дан 18 ёшгача бўлган қизлар учун мўлжалланган йирик танлови бўлиб, Google, Yahoo, Adobe, Intel, Oracle, Dropbox, 2015 йилдан бошлаб эса БМТнинг UN Women тизими кўмагида ўтказиб келинмоқда.
Дастурнинг асосий мақсади қизларни жамият муаммоларини ахборот технологиялар ва тадбиркорлик кўникмалари ёрдамида ҳал этишга ундашдан иборат. 5 нафар қиз ва устоздан иборат жамоалар 12 ҳафта давом этадиган ўқув дастури давомида нафақат мобил дастурни ишлаб чиқади, балки маркетинг тадқиқотлари ўтказади, бизнес-режалар тузади, видео суратга олади ва янги кўникмаларга эга бўлади.
Тайёрланадиган маҳсулотлар БМТ барқарор ривожланиш йўналишлари — соғлиқни сақлаш, таълим, атроф-муҳит, фаровонликни таъминлаш ва бошқа мавзуларни қамраб олиш лозим.
Лойиҳалар тақдим этилганидан сўнг бутун дунё бўйлаб 10 та финалчи жамоа танлаб олинади ва улар Калифорнияда (АҚШ) бўлиб ўтадиган якуний босқичга таклиф этилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)